謝安琪開刀誕7磅半B女 取名張靖Karina

謝安琪開刀誕7磅半B女 取名張靖Karina 40歲的歌手 謝安琪 (Kay) 去年宣布停工,造人成功再陀B女,轉眼間B女今日就出世啦!老公 張繼聰 剛剛笑容滿面地在醫院門外會見傳媒,宣布女兒在下午三點多出世,中文名為「張靖」,英文名則是Karina,恭喜阿聰同阿Kay! 停工造人成功 阿Kay去年完成出道十年「拾回謝安琪數愛世界巡迴演唱會」後,便宣布暫別樂壇,努力造人。不經不覺阿Kay已懷胎十月,預產期為今個月底,上星期更有消息傳出佢已入院生B,原來只係虛驚一場。近日仲見到阿Kay同朋友飯局,本以為離生B仲有一段日子,估唔到B女今日已搶閘出世啦!謝安琪 開刀誕7磅半B女 今日下午5點左右,戴眼鏡、身穿黑色外套的阿聰在沙田仁安醫院門外現身,佢先企定定、笑容滿面俾傳媒影相,其後又向在場人士送上曲奇餅及飲品。阿聰透露女兒在下午三時多出生,重7磅半,係開刀出世。佢剛才陪太太入手術室開刀,讚太太同囡囡都好叻,好快就順利出生,好快就聽到喊聲。 今次阿聰有幫手剪臍帶,佢記得上一次望到臍帶時嚇到個心離一離,因為估唔到臍帶原來係咁粗,而今次亦剪咗三下先成功!阿聰又指自己今次盡量表現得堅強,而醫生亦叫佢講講笑令太太放鬆,但佢嗰一刻腦袋一片空白,只係不停講「加油啊,加油啊」! 女兒報夢改名 另外阿聰透露已經為女兒改名,中文名叫張靖,英文名則為Karina。中文名係因為張氏夫婦都鍾意呢個「靖」字,有恬靜、安靜的意思。阿聰又笑指女兒的英文名本來另有打算,不過有一晚佢發夢時見到一個可愛小女孩,小女孩話希望自己叫「Karina」,因為想和媽媽英文名「Kay」的頭兩個英文字一樣。既然女兒報夢選擇自己英文名,阿聰當然贊成!被問到大仔張瞻見過妹妹未,阿聰表示囝囝朝早問可唔可以唔返學,一齊等待妹妹出生。不過阿聰認為女兒出生都係兒子放學後的事,所以張瞻都係乖乖返學啦!阿聰稱兒子稍後時間會由家人接送到醫院,佢亦好期待兩個小朋友見面的一刻。 生兩個夠曬數 阿聰指在手術室期間,完全感受到母親的偉大,同時亦為太太的辛苦而心痛,所以生兩個絕對夠曬數。佢笑指除非科技發展到可以男人代生,否則都唔會再生了。不過對於外界指阿Kay打算結紥「收肚」,阿聰就話兩公婆從來冇諗過。 來源:hk.mobi.yahoo.com


[圖擷取自網路,如有疑問請私訊]

本篇
不想錯過? 請追蹤FB專頁!    
前一頁 後一頁