李思捷舊愛 被鬼上身

雖然農曆七月仲有一段時間先到，但大家唔好以為鬼門關未開，就唔驚時運低撞鬼喇！咁諗，就真係超錯！早前，李思捷舊愛馮鎵瀠（Naomi）同模特兒邱美薇跟玄學家吳佩孚，去到城門水塘探靈，拍攝《東周網》嘅靈異特輯；期間，吳師傅就提議以兩個女仔嘅肉身做媒介，嘗試同靈界朋友溝通。

當晚疑似被鬼上身嘅Naomi，事後就喊爆咁話：「師傅幫我作法時，我覺得個人好凍、好凍，凍到好似結咗冰咁，之後就有一股寒流喺背脊嗰度，之後就話個靈異朋友已經上咗我身。嗰刻，我好似打咗麻醉針咁，成個人暈咗，我開始感覺到個靈異朋友嘅嘢，我真係好驚、好驚！驚到o依家都未驚完！」Naomi仲話，當晚醒番之後，成個人虛脫，口渴到飲咗一支水。
邱美薇亦表示，覺得全晚都有嘢喺佢身邊飄嚟飄去，毛管戙晒咁話：「我真係好驚！我直頭覺得有一個喺我身邊徘徊，跟住又朝着Naomi嗰邊撲過去。」
兩位妹妹講得咁恐怖，東姑當然即刻睇片求證，就見到疑似Naomi被鬼上身嘅一個鏡頭，佢個樣又真係變得鬼咁猙獰，身旁無端端有團煙飄過，都幾詭異。不過，東姑始終認為鬼神之說，信不信由你，最緊要都係平生不作虧心事，半夜敲門也不驚啦！

本篇	不想錯過? 請追蹤FB專頁!

喜歡這篇嗎？快分享吧！

前一頁 後一頁