業績受挫 Harley推出「電」單車

Harley Davidson或者係世界上最多人識嘅電單車品牌,近年推出嘅新款亦獲得唔錯評價。不過根據佢哋早前公佈嘅2017年度報告,佢哋嘅表現其實唔係表面上咁好:全球銷售額按年下跌6.7%,美國本土銷售額更加跌8.5%。其中一個主要問題係「電單車人口」老化,鍾意傳統肌肉電單車嘅人越黎越少,銷售額自然就下跌。咁解決方法?好簡單,吸引返啲後生仔黎咪得。或者就係因為咁,Harley Davidson就宣佈會於18個月內,推出原本估計要於2021年先能夠成功推出嘅「電.單車」。早於2014年Harley就已經推出名為「LiveWire」嘅電.單車試作形,0-100km/h 只需4秒,經濟模式下航程為88km (55哩),為咗滿足聽慣汽油燃燒、氣缸翻飛嘅電單車愛好者,仲特登加入「人工引擎聲」。而未來推出嘅形號如無意外都係源自LiveWire,但目前並無公佈任何規格數字,只能憑常理推斷航程會比當年改善。
LiveWire曾經於《Avengers: Age of Ultron》中出現過
近年市面上真係推出過成功嘅「電.單車」(如Zero Motorcycles),所以今次Harley推出電動車亦唔算係衝動之舉,亦確實係破舊立新嘅第一步。為咗節省成本,Harley已經先後關閉位於密蘇里同賓夕法尼亞嘅兩條生產線,裁走過千個職位。唔知一架於18個月後推出,唔知會唔會成功嘅「電.單車」又會唔會成功救回呢個百年品牌呢?The Verge


[圖擷取自網路,如有疑問請私訊]

本篇
不想錯過? 請追蹤FB專頁!    
前一頁 後一頁