「快．狠．定」──Subaru WRX STI

Text: John Kai Chin ChanPhotos & Video: Heat Production早排睇Subaru日本網頁，無意中發現WRX車系（前稱Impreza WRX）原來已有四份一世紀。記得25年前，即係讀緊中二、中三，開始認識喺WRX之上仲有性能更強勁嘅STi（現改用全大草英文STI），嗰時我將Impreza WRX STi嘅雜誌廣告，攝喺透明「包書膠」同課本之間，我記得任教物理嘅老師，見我拎本有個勁大STi logo嘅physics書上堂，曾經「啤」過我好多次，從佢眼神 ，我估佢可能咁睇我：「呢隻仔都係冇心機讀書㗎喇，上我堂淨係掛住WRX、STI、4WD、WRC、easy left、easy right⋯⋯」托賴，而家總算搵到餐晏仔，又可以經常試揸Subaru嘅新車同經典型號。

個人認為，近年嘅WRX STI，其實比廠方活躍世界越野錦標賽（WRC）年代嘅出品更成熟，所指嘅成熟，當然係全車設計、調校，具體啲講，而家WRX STI底盤、車身、懸掛都非常之紮實，同相近售價與定位嘅歐洲對手冇大分別。那些年，GC8 WRX激劈時車架輕微扭擺嘅古怪感覺，已成歷史。


過去四個年度，Subaru都為WRX STI作年度改良及升級。2018年度新款WRX STI，重點包括Multi Mode嘅DCCD中置差速控制系統、Brembo高性能制動系統（前6活塞／後2活塞）、19吋新款合金輪圈配245/35 R19輪胎、雙出四管排氣喉、SRH轉向感應頭燈等等。






先講引擎，熟悉嘅2.5公升水平對向四汽缸Turbo引擎 ，最大馬力300匹/6000rpm ，峰值扭力40.7kgm/4000rpm。試車時嘅實時體感，尤其是短途加速，令你覺得佢絕對唔止300匹，亦都唔止40.7kgm扭力，喺3500rpm至6200rpm呢一段，加速力度十分狂猛，感覺就似周身肌肉嘅大隻佬，一手搣爛成本黃頁電話簿咁激，仲要喺由書脊位落手，一氣呵成，兼且係快、狠、定。



2018年度新款WRX STI嘅DCCD中置差速控制系統，採用電子化控制系統，取代已往機械與電子中央限滑差速鎖控制系統，優點係反應更快更順暢。Multi Mode方面，包括「Auto Mode」、「Auto－Mode」、「Auto + Mode」同「Manual Mode」。Manual Mode另設6段手動選擇，畀用家控制電子中央限滑差速鎖（LSD）嘅鎖合程度。

喺已往嘅DCCD使用經驗，我有時幾鍾意推去「＋」嗰邊，循跡力即時大增，冇錯，轉向不足情況係明顯咗，但呢種帶有搏鬥味道嘅駕駛感，喺山路快揸另有一番趣味，你會覺得成部車嘅機械連動感覺好濃烈，實際而言，雨中跑山路用呢個Mode，Grip好多，過癮！


Auto Mode方面，我亦好滿意，喺鋪裝質素好嘅平滑柏油彎路，WRX STI冇已往同系家族成員嗰種被過份管束嘅繃緊，冇被「勒住勒住」，亦好易感受到整部車動態好靈活、舒暢，但循跡力依然好好。如果你玩高性能Turbo四驅快車嘅心態係：我唔鍾意諗太多嘢，電腦幫我搞掂就得，咁揀Auto Mode係最簡單嘅設定，但我都極力推介你多啲比較Auto－Mode同Auto + Mode。咁好用又咁先進嘅device，冇理由唔用啩，米咁懶啦！6前速手動波箱方面，1至5波嘅齒比算幾緊密，例如4波1.137、5波0.891，難得兼顧到跑彎同跑高速直路嘅要求。所以，無論係起步，又或者處於4、5波，想再急速發力，動力都係「話有就有」。檔閘方面，行程雖然短，但好清楚，緊緻得嚟係順暢，「快劈」嗰陣好爽。


「螢光色」嘅Brembo前6後2活塞卡鉗相當搶眼，我喺多段下坡道反覆重煞，完全唔多覺有制動力衰減（fade） ，而且制動踏板行程與實際制動反應，有好清晰嘅比例，總覺得部車好肯畀反應你。據一位喺賽道試過車嘅北美行家表示，呢套brake「超好收」，聽到我好想去trackday「轟返幾轉」，雖然明知部車唔係屬於我。











近期2公升至2.5公升級高性能Turbo房車/掀背車巿場又趨熱鬧，當中價格嘅差別相當大，車價達90多萬都有。46萬元有找嘅新款WRX STI，無疑親民貼地得多，坦白講，相近價位係零對手。佢有非常易於發揮嘅一面，又可以畀用家根據個人口味自行調節DCCD嘅操作特性，擺到明「新手」「高手」全對應。唔好諗喇，係有Feel就快啲打畀代理約睇車啦！

Subaru WRX STI規格售價：$459,800代理：Motor Image  www.subaru.asia/hk電話：2828 2488車型：四門五座體積：（長）4595mm x （闊 ）1795mm x （高）1475mm軸距：2650mm引擎：2457c.c. 水平對向4汽缸渦輪增壓，前置引擎馬力：300匹/6000rpm扭力：40.7kgm/4000rpm波箱：6前速手動傳動：全時間四輪驅動，DCCD中置差速控制
制動：Brembo（前）6活塞、（後）2活塞卡鉗；前、後透氣碟懸掛：（前）獨立麥花臣支柱；（後）獨立雙搖臂耗油：10.9L/100km
輪胎：Yokohama Advan Sport V105 245/35 R19（前、後）


[圖擷取自網路，如有疑問請私訊]