我買樓，因為不想再當「兵」

我係一個肥仔，人生目標得一個！就係跟住我女神阿怡。我知㗎，你哋覺得我做兵好冇大志呀嘛，論兵種，更加只係最低層次嗰隻－步兵，我班豬朋狗友甚至叫我做「肥兵」，so what？我都覺得not a big deal。我enjoy咪得囉，你理得我啫，this is my 「肥兵lism」。

「James，你上次咪話想食咖啡弄嘅，我今日陪你食啦。」阿怡呢一個WhatsApp，好似搞錯咗啲野，明明上次係佢話想食，點解話係我提出？何況，我最憎排隊，偏偏呢間野排隊係要排一世的！之前諗住「佔中」會少人啲，咪同阿怡去博下有冇位，可怒也，條隊咪又係排到落樓下！面對「排隊」，香港人都展現同抗衡689同等頑強嘅生命力。「好呀，咁我去排定隊先:)。」點都好，根據「肥兵lism」第一章第二節，阿怡是道路、是真理，佢話我好想食咖啡弄，我就係想，我覆佢「多謝你肯陪我食呀！（T.T)」。然後阿怡回我一個emoji，有心心嗰個飛吻公仔，我足足開心左一日。

就算係步兵，我都好肯定我肥兵係一隻好成功嘅步兵！至少阿怡事無大小，都會諗起我，仲俾機會我去幫手，「James，我屋企啲牙刷用晒，可以幫我買嗎？我喺屋企樓下等你。」「James，你咪話想減肥嘅，我陪你去intercon食buffet，你忍住唔食當training」「James，你咪話想信用卡儲分嘅？幫我買個Prada袋你咪可以儲囉。」當然支牙刷、餐buffet、同埋個Prada袋，我都冇問佢拎返錢，根據「肥兵lism」第七章第九節，時刻緊記，能夠介入阿怡嘅生活，係我嘅幸福。

「James，不如我地一齊買層樓⋯⋯」OMG！阿怡係想同我一齊築起一個安樂窩嗎？我哋要結婚？生仔？生一個好定兩個好？⋯阿媽！我得咗啦！不過，我原來想得太多「James，你咪話想儲錢嘅，不如買層樓一人一半，我地可以放租，你知啦，佔唔佔中，樓價都係照升，都係買磚頭好。不過我錢唔多，得10萬蚊，你俾埋其餘首期先。」

What the⋯擺明不平等條約，聽到呢度，我知道我一定要變身，我要做一個清兵，因為我心口需要一個「勇」字。「阿怡，唔係我唔想俾，但啲錢我想留番去讀書⋯」今次係我人生第一次同阿怡say no，而阿怡個反應，係我發夢都估唔到咁⋯，「你依家講到錢就唔識人啦！係咪？」從阿怡的眼神，我不見從前的女神，反而看見憤怒、鄙視、邪惡、拜金、公主病⋯呢個moment，我醒了！

「咪再當我傻仔，我係唔會買層樓俾你！」「咩買俾我？我都話係夾份！係你話想儲錢，我先幫你諗方法，講到我呃你咁，好心著雷劈。」港女果然係長不出象牙，我一定要反擊！「你咁都唔係昆我？首期你俾得10萬就想分一半？依家有咩樓係20萬就做到首期？墳景劏房戶都唔得啦？如果我真係放租，你連供都唔使供，10萬就想做業主？玩我呀？」「我肯同你夾份買，你應該要謝主隆恩，竟然仲鬧返我？下次唔使指意我陪你食咖啡弄；做減肥buffet training；幫你儲信用卡分！」

睇到佢猙擰嘅面孔，我爆了！「好啦喎，做人不好太『滬港通』！你次次都話為我好，明明最著數係你！你估我真係豬到睇唔出莊閒呀？你咪好似大陸market咁，表面話「滬港通」係益香港，依家扮晒野啦，話收返「賞賜」諗住顯得佢更矜貴？問心係香港人想買A股多，定係想拎錢落香港嘅大陸人多？你同大陸一樣，咪用梗街邊「寶藥黨」啲屎橋，捉心理抬高自己啲爛貨！可恥呀你」我一手指向佢塊臭臉，「你跟本就係一隻爛A股！」

我勝利了，對住阿怡呢隻爛A股，我終於可以挺起胸膛做人，正當我想好型咁轉身離開時。「你肯買我同你結婚，如果唔係，你之前喺我身上嘅付出就全部白費。」呢隻A股用上好毒的一招，就好似馬時亨講話：「如果唔一地兩檢，用700億起嘅高鐵就淪為快啲嘅直通車」一樣咁毒。不過我讀過econ，知道sunk cost呢個概念，bygones are bygones，花咗嘅錢根冇資格做機會成本。我係知道的。

「好啦，我買層啦。」知道又點，理智戰勝唔到感情，女神喎，有得結，但唔結，好蝕。「肥兵lism」最終章最後一節：如果步兵獲得升呢嘅機會，緊記「有得升，升住先」，就算你預見到未來可能會好苦⋯甚至係一個伏⋯都要升左先，但同時記住，第時有咩事，唔好怨，因為係自己攞嚟嘅。

結果，為了脫離步兵之列，我做咗業主。

完


[圖擷取自網路，如有疑問請私訊]