［轉］地產妹日記 — 表面風光的背後

做地產呢一行，表面，係表面一定要好風光。冇人會想同一個愁眉苦面嘅腳仔合作；個個客都會想同一個紅嘅經紀買樓。所以即使自己心情有幾唔好，我都一定以最正能量嘅樣面對大家（經理除外）。得閒笑吓；同D同事講爛GAG；引吓D客笑。我深信一個笑容可以令自己一天變得更快樂，令身邊嘅人變得更快樂。由我開始一路傳遞出去，全公司都會環繞住快樂嘅氣氛，就連電話另一邊嘅業主都可以感受得到，即使佢呢唔買嘢，佢都會⋯⋯⋯⋯（繼續D正面嘢）
係咪好懷疑會唔會有人做得到？我每一日，都係咁⋯⋯尤其是對住行外人，因為唔係做地產嘅根本唔會明白我地呢一行有幾難挨⋯⋯同佢地講佢地係唔會明⋯⋯
打UPDATE打到我有D頭暈，電話响了！
阿爸：「囡呀！你幾好嗎？有冇生意呀？成個月冇返屋企飲湯喇！（我地唔係一齊住）」
我：「爸爸！公司好忙呀！打新盤呀！我晚晚都好夜放呀⋯⋯」
阿爸：「放假返屋企探吓我同媽咪啦！我呢～今日我掉了一隻門牙⋯⋯」
我：「點解會咁㗎？快D整返啦！」
阿爸：「醫生話我D牙肉開始收縮喇！以前我仲覺得自己40幾歲，今日我終於知道即使自己嘅心情有幾年輕都好，身體都無法永遠年輕⋯⋯」
爸爸平時好少打電話俾我，一般都係媽咪打泥BILIBALA。
枉我平時不斷地發送歡樂俾其他人，原來一直，我忽略咗一直企係我身後，係屋企等緊我嘅爸爸媽媽⋯⋯
放假果日我瞓醒就返屋企陪佢地。我發覺，媽媽好似矮咗少少；爸爸嘅頭髮好似少咗少少，冇咗隻牙仔
每一次我返到屋企都只係不斷呻我返工好辛苦，成日比D客玩，公司扣佣⋯⋯今日，我唔敢講
我不斷講D得意嘢比佢地聽，氹佢地笑，呢餐飯係笑聲中渡過
原來，時間真係唔等人。尤其係D老人家身上，可以見得好明顯⋯⋯
阿妹今天明白了……成長嘅路，係孤單⋯⋯要有博頭，有D眼淚係唔可以俾人見到
睇緊我呢段嘢嘅你，一定有人等緊你電話，一定有人等緊你食飯，你明的⋯⋯




原文：地產妹日記


[圖擷取自網路，如有疑問請私訊]