[高登轉載] 致所有由中學開始拍拖既小情侶 by 兩粒燈

其實篇文2月出既，不過最近先係睇高登返。到有位巴打既一篇自我讀白，講同佢女朋友既經歷，其實中學時期既戀愛真係最Pure最true，唔係太講物質同錢，番學後四圍行下街已經好滿足。純粹share呢篇等各位巴打睇下，希望大家都珍惜身邊既愛侶，未有既都唔好灰心。—————————————————————如果睇緊呢篇文既你係讀緊中學而未有男女朋友既話，我強烈建議你要快D搵番個；如果有既，我好希望你認認真真咁睇哂呢篇文，捉緊身邊果個人，唔好令自己第時後悔遺憾一世。
中學既時候戀愛一定係最單純，最青澀，亦都係最真。當時既你地唔使諗將來前路，唔使驚唔夠錢洗，唔使向現實低頭，可以勇者無懼咁拖住隔離果個埋頭衝去做你地想做既事。儘管當中可能有好多好多障礙，屋企人唔比你地拍拖，老師日日都勸你地公開試前都唔好拍咁多拖哂時間用黎溫書仲好，身邊既朋友都話你地兩個唔夾無乜可能可以keep得長久，但呢D意見你地通通都唔會聽。因為當時你地既世界好簡單，簡單到只係得對方就已經足夠，甚至如果有條向左走向右走Hi問你肯唔肯呢一世人每一日都只對住呢個男／女仔，你都會毫不猶豫答佢你願意。
正正因為一齊讀同一間中學，提供比你地日日見既機會，你地會不由自主咁將生活既每一環每一個細節都同佢扣上關係。筆袋爛左你會同佢一齊去買，甚至搵人訂造兩個情侶款筆袋，驚死人唔知你兩個一齊；每日小息lunch time你地都會痴埋一齊，直程搞到好似你地兩個係學校再無其他朋友可以一齊食飯咁；放學你地都會約埋一齊走，係搭車返屋企之前想盡辦法拖時間去食下野睇下野，為既都只係想見多對方一頭半個鐘。亦都係因為無可避免地會日日見，你地之間有咩嗌交爭執，都可以好快面對面咁拆掂佢，唔使積住積住，而個男仔亦都會忍唔住同個女仔認下衰仔，奶番個女朋友番黎，結果就好快可以和好如初。
直到畢左業，如果你地係咁好彩可以升到同一間大學仲要同一科既話，咁我真係幫你請定小鳳姐都得啦。但對於絕大部份唔係既情侶，都必須面對環境轉變呢個問題。人大左見既野多左，自然想更貪心去認識接觸其他新既事物。拿你班Hi Hi唔好睇到就留低句come on james就收我皮，原來有時一段關係既結束真係未必關第三者事，無論你地為左對方付出幾多犧牲左幾多，但係當兩個人既生活軌跡再唔一樣，生命上再無交叉，好自然感情就會淡。而呢個時候如果雙方都唔alert有呢個問題，直到有一日其中一方再頂唔順呢種無力感，就會出事。我同我前女朋友由初中開始拍左六年拖，今年year 2，半個月前佢提出左話要分開。我原本以為自己可以好瀟脫咁頭也不回就繼續生活，搵更多條件比佢好，性格無佢咁臭脾氣，生活圈子模式同我更加夾既女仔。但當我回首一望，原來我個心已經唔到我話事，當我衣櫃中既每一件衫，我手機中既每一首歌，我相簿中既每一張相都可以拎出黎講到一個淨係屬於我同佢既故事，我就知道已經返唔到轉頭。我以前成日都會諗佢就係我既mrs right，以為可以同佢平平淡淡咁過之後既日子，以為捱過公開試就可以一直去到結婚。我都承認我係低估左佢係我心目中既重要性，呢半個月黎都頹到Hi Hi，日日都走堂收埋自己係屋企／hall喊，每一次經過同佢去過既地方就會眼濕濕個腦閃番以前同佢一齊既畫面。但又咁講，人生中最青春就係中學既時光，而當你既青春係圍繞住一個人，呢個人就係你呢世最重要既人，其實都好合理姐？  佢提出分手果陣話過因為佢覺得我地已經唔再係中學時候既我地，唔係所有野都可以用一個愛字就解決到，有D現實上既難關，行唔過就係行唔過。所以，我係真心想係度同所有由中學開始拍拖既小情侶講，你如果係珍惜對方既，唔好怕煩怕悶怕長氣，畢左業唔好let go對方。一個唔理但另一個著緊，都仲可能有得挽留返，唔好等到對方心死先識珍惜先諗返以前有幾甜蜜有幾幸福，到時已經無用嫁啦。捱得過剛剛轉換環境呢幾年，就可以捱到去結婚生仔終老呢步嫁啦，唔好好似我咁呀，加油。 我知佢都唔會上高登，唔會睇到呢篇文嫁啦應該，除非呢篇文人推左上Facebook啦。但點都好，我都想講我呢個superman點都會等妳。 http://archive.hkgolden.com/view.aspx?message=6239442 圖片: 電影:那些年我們一起追的女孩


[圖擷取自網路，如有疑問請私訊]