網民熱話：搭的士叫A貨定B貨？行內術語曝光

:0:0

日常搭的士時，都會聽到的士大哥和其他司機閒聊對話，「啱啱去加油，聽到個仇家話今朝食咗幾個定食，已經著燈，難為我今朝啲咸豆又難哽！」作為乘客的你，聽到此對話定必感到摸不著頭腦，為何見到仇家還不離去，更要偷聽其說話？其實整句說話是的士的行內術語，內容是交代其早上生意情況。
近日社交網站facebook「廣東話資料館CantoneseMuseum」專頁內，上載一部分由蕭南仁注釋的香港的士術語，惹來不少網民熱議瘋傳，例如「加油」即去吃飯、「仇家」即不認識的司機、「定食」是一個價錢全包、「著燈」是過1000元生意、「咸豆」即低過85折的柯打(Order)、「難哽」是行紅隧。
若根據上述用語解釋，「啱啱去加油，聽到個仇家話今朝食咗幾個定食，已經著燈，難為我今朝啲咸豆又難哽，仲要有奶粉罐！」即是司機剛去吃飯，聽到一名不認識的司機早上已接數張價錢全包的柯打，並賺取過千元，但此司機早上卻只有85拆的柯打，更要行紅隧，而客人仲有行李。
不少網民紛贊的哥很有創意，更補充部分文中未有列出的術語，如「油菜」即交通意外、「田雞」即下大雨時上車的短程客人、「短腳雞」即短途客；有網民建議大家下次搭的士時，可自行串連部分術語和司機溝通；有網民笑言，要記著所有用語，可能難過考的士牌。
其他術語：(術語/解釋)
奶粉罐/即有行李的客人
A貨/85折
B貨/8折
字仔/咪錶銀碼
TV/快相
土魷/土瓜灣
大站/紅磡火車站

左脾/佐敦
打鑼/銅鑼灣
柴房/柴灣
落井/去深井
潛水/過海
冬瓜仔/抱嬰兒的客
食飯飲茶/加油
爛賭碼頭/港澳碼頭
網民有話說
佬訊：要記到呢揪(串)的士術語，分分鐘已經難過考個的士牌
ManChan：田雞=落大雨跳上車的短程客
FannyChang：短腳雞＝短途客
KaimanCheung：其實有好多唔系的士佬先會講，我地(哋)做工程都系咁講
EstherLeung：的士司機好有創意

[圖擷取自網路，如有疑問請私訊]