楊怡羅仲謙今日大婚！滿手龍鳳鐲，兩人更咀足六次，閃爆了

:0:0

藝人羅仲謙與楊怡今日大婚，二人對於今次婚宴籌備重視非常，更親自落手落腳設計婚戒，再交由專人打造，並命名為「愛的城堡」。該對「愛的城堡」，由設計到打造，足足花了3個月時間，並且是「全球獨家」，設計及意念均別出心裁。

參與婚戒打造的珠寶師訪問時表示：「靈感源自二人於英國利茲城堡拍攝婚紗照。這是英國13世紀的皇家城堡，歷代國王將之送給王后作為宮殿，正如謙謙想將這份心意送畀阿怡咁。戒指採用城堡邊線元素，加入雙方英文名嘅首個字母為整體造型，戒壁內側更刻了婚禮主題logo，寓意呢一日呢一刻將永記在心。」認真sweet爆！

小兩口會跟足中國傳統習俗，已有兩日未有見面只靠電話保持聯絡。由於二人於圈中人緣甚佳，婚禮上的兄弟姐妹團絕對星光熠熠，當中包括唐詩詠、張美妮、阿怡姐姐楊卓娜、吳卓羲、馬國明及單立文等共18人！近日張名雅婚禮掀起「開門利是風波」，然而謙謙卻冇有怕，事關自從宣布與阿怡拉埋天窗後，謙謙工作浪接浪銀包鼓鼓的，故他準備了約10萬港元現金，與姐妹團「開心share」！

謙仔受訪時未有明言開門利是實際數目，不過卻未有否認，他說：「總之系開心嘅開門利是，希望大家都開開心心，enjoy the party！」謙謙更坦言自己進入人生另一新階段，明白日後做人老公責任更大，會全力以赴。

新郎及兄弟團一早八點幾就已經出動，現身酒店準備接新娘，星級兄弟團包括何君誠、馬國明、吳卓羲、單立文及王浩信，現場更出動到航拍，實行多方位紀錄今日婚禮！

謙謙接受訪問時猛流汗，又聲沙沙同記者傾偈。問到今日心情如何，謙謙直言心情既緊張又開心：「好矛盾，好似未整理好個思緒咁，都開心嘅，（心情）又緊張、又混亂，好驚自己帶漏嘢，一朝早好似傻咗咁，周圍去check嚇啲嘢齊曬未，雖然都已經齊曬。（把聲沙沙哋？）系呀，瞓得唔系幾好，因為尋日我哋系唔可以見面，其實我同阿怡都兩日冇見，變咗自己一個人喺屋企就靜靜哋諗嚇嘢。（冇開party？）冇呀，冇呀，冇呀！（掛住楊怡掛到瞓唔著？）呢兩日其實都系諗結婚嗰時大家要講啲乜嘢，自己又唔系好識講啲甜言蜜語、好感動嘅嘢，但系又唔想冇創意，所以呢個都系煩腦啲。」

提到新郎哥接新娘時有咩「開門攻勢」，謙謙直言會先以金錢攻勢應對，再用體力及俊男兄弟們嘅美色，當記者再次問到金錢攻勢準備幾多錢，謙謙繼續耍太極：「唔好、唔好，總之開開心心就得，大家唔好掛住喺銀碼上面嘅嘢。」講到接新娘時玩遊戲有冇底線：「聽老婆（楊怡）講，因為大家都系靚仔靚女，咁就唔好搞亂個髮型，大家落到嚟都要見人，頭以下都可以任玩！食蟲就冇咩所謂，最玩得就梗系豹哥（單立文）啦，飲得嘅就系王浩信佢哋，我就樣樣都唔得。」