2016七個成功上位嘅TVB藝人！一定有你鍾意果個！

:0:0

呢幾年TVB一直鬧緊小生花旦荒，一哥一姐相繼離巢，北上發展呀、結婚生仔淡出幕前呀，各有各離去……
不過，有危先有機，一眾捱咗多年未紅嘅演員及電視新鮮人，正好可以把握機會上位！
以下七個就系2016年成功上位嘅TVB藝人：
1. 朱千雪

2012年香港小姐選舉大搞全民普選，豈料伺服器發生問題，令朱千雪失落后冠，根據多方面嘅民意調查，獲得季軍嘅朱千雪才是民選冠軍。雖然朱千雪極具人氣及觀眾緣，但一直被TVB投閒置散。

好彩嚟到2016年，朱千雪終於獲得機會擔正做女一，喺《EU超時任務》有出色表現，爽直熱血嘅女警一角，令人印象深刻。另外，佢上《街坊廚神舌戰東京》做嘉賓，率性大鬧金剛嘅爆笑片段，可愛又搞笑，令佢戲裡戲外都人氣高企，男女觀眾都buy！

朱千雪唔單止人靚樣甜，更系才女，而家攻讀緊香港城市大學法律學院法律博士課程，向多方面發展！呢位高學歷女神，絕對值得有更多嘅發展機會！
2. 李佳芯

由《名門暗戰》同黃浩然有激烈床戲嘅小三角色，到《潮流教主》奸到出汁嘅好勝女；從《學是學非》清純可愛嘅主持形象，到《律政強人》嘅正義律師，李佳芯皆演繹得遊刃有餘。

2008年喺有線出道，2012年簽約TVB，4年嚟默默做，今年喺《律政強人》擔正做女主角，都毫不怯場，終於憑住精湛演技，獲得廣大觀眾喜愛。

李佳芯戲路甚廣，能駕馭清純脫俗、成熟大方、性感誘人等角色，可塑性極高，今年仲攞埋「飛躍進步女藝員」，相信將會系唔少監製嘅新寵！
3. 張穎康

入行16年嘅張穎康，終於喺2016年為人廣泛認識。佢喺《一屋老友記》中飾演嘅「三寶」，系一個愛妻老婆奴，深入民心，受觀眾大讚，人氣急升。

回到未紅時，佢一直都系做一啲小配角、茄喱啡，從《貓屎媽媽》嘅范發、《回到三國》嘅范根，到《舌劍上嘅公堂》嘅樊庚，佢一直努力咁演好每個角色。可惜，夢想買不到溫飽，幾年前被逼面對現實，走去做一個普通文員。後因一場車禍，生死之間發現無忘演員夢，喺老婆麥雅致嘅無條件支持下，佢重回TVB，繼續追夢。

人生如戲，「三寶」一角令佢喺2016年彈起，更令佢獲得「飛躍進步男藝員獎」，奪得演藝事業首個獎項，相信百般滋味在心頭，難怪台上致詞時感動落淚！16年嘅歷盡辛酸，呢個獎項絕對是一個肯定！
4. 王君馨

榮獲2007年港姐亞軍嘅王君馨，入行9年，浮浮沉沉，觀眾對佢嘅印象相信大多來自《舞動奇蹟》中出色嘅舞姿，以及《My盛Lady》中嘅「傻的嗎」。王君馨捱足9年，曾因收入微薄，搞到要寄人籬下。

演員一生可能喺度等緊一個角色，王君馨喺2016年等到了，憑住《城寨英雄》中花曼一角跑出。花曼風情萬種、睇得又打得，王君馨落足百分之二百嘅心機去演，狂練20.5寸黃蜂腰，努力練武打場面，絕對吸睛！王君馨演技大躍進，將身世可憐嘅花曼帶到觀眾眼前，惹人憐愛，個個都like爆！

極多觀眾撐嘅王君馨，終於獲得今年嘅「最受歡迎電視女角色」，呢位新一代性感尤物有如此成績，可謂苦盡甘來。
5. 龔嘉欣

台慶劇《幕後玩家》跑出多位演員，而飾演苦情大婆嘅龔嘉欣，憑住一連串喊戲，大獲觀眾嘅喜愛，人氣急升。

龔嘉欣18歲出道，入行以來緋聞一籮籮。媒體習慣將焦點放喺佢嘅緋聞上，2016年，龔嘉欣以實力扭轉呢個局面。佢喺《幕後玩家》飾演嘅秦太一角，面對老公偷食，小三踩上門，情緒大崩潰，連續三場喊戲有層次、有演技，人人激贊。

龔嘉欣系一位勤力嘅演員，今年終於演到代表作，哭功犀利到贏盡觀眾讚賞，仲攞埋「最佳女配角」，唔簡單喎！
6. 劉佩玥

劉佩玥絕對系新人王，2016年經常睇到佢嘅演出！今年《實習天使》嘅貞子、《EU超時任務》嘅賀小美、《僵》嘅兒姐姐、《一屋老友記》嘅星晨、《城寨英雄》嘅柯德莉同《幕後玩家》嘅Emma，差唔多套套重頭劇都有佢份，由年頭帶到落年尾！

每個角色嘅性格都非常唔同，劉佩玥拿捏得宜，相信落咗唔少苦功。一向形象乖巧嘅佢，喺《幕後玩家》大玩邪花角色，人見人憎，顛覆咗觀眾對佢嘅印象。出道無幾耐就有如此成績，又有觀眾緣，預計劉佩玥將會被TVB熱捧！
7. 張彥博

喺《一屋老友記》中飾演細寶而成功彈起嘅張彥博，原嚟已經35歲，童顏嘅佢演繹廢青角色，毫無違和感。

張彥博嘅演藝之路，崎嶇不平，2005年以赤子樂隊身份出道，經歷樂隊解散、參加內地歌唱比賽失敗收場，捱足十年，辛酸又坎坷，試過一日三餐食即食麵食到入醫院。浮沉多年，喺TVB一直做閒角，對白唔多。2016年，終於等到孻仔細寶一角，同一眾演技派大有對手戲，喺劇中佢更有機會大展歌喉，令觀眾開始留意佢，成為佢事業上嘅一個重要突破。
咁呢啲成功上位嘅藝人，你又最鍾意邊個？

[圖擷取自網路，如有疑問請私訊]