出少句聲無人話你啞！ 7句生暗瘡時最憎聽到嘅說話

天氣轉變再加上飲食問題，面上皮膚差到一個點，若然「爆瘡兼爛面」，就連街都不想出，相信這些心情同問題，係正在經歷又或者係曾經「爛面」的人先會明。所謂「爛面」，即係指面上有至少有一半嘅皮膚都持續爆緊暗瘡，同間唔中生幾粒暗瘡係完全係兩回事！當你自卑到連同人有眼神接觸都不敢的時候，就會好容易聽到以下7句難聽過粗口的說話。
閱讀全文
生暗瘡又爛面？邊句說話最難聽﹗1.「嘩你塊面搞咩啊？」我自己都好想知，知就唔使搞成咁啦！你問我，我問邊個？

2.「你啲暗瘡好似又多咗喎！」其實我有照鏡的，暗瘡多咗我自己好清楚，唔需要你嘅「溫馨提示」喇，唔該！

3.「你有冇洗面啊？係咪唔乾淨？」一定係冇洗啦！如果洗面=冇暗瘡，我會每日24小時全職洗面。你問得呢條問題，就知你應該未生過暗瘡。

4.「好心你咁多暗瘡就唔好化妝啦，愈化愈衰！」你知唔知1個「爛面」中嘅女仔，要坦蕩蕩、完全冇遮冇掩咁見人係需要幾大嘅勇氣。化妝遮一遮，想靚女啲咁出街都唔係好過分啫！不過，大前提係落妝一定一定要徹底。

5.「你重食咁多熱氣/甜嘢，因住又爆多幾粒瘡！」邊個話生暗瘡一定關食嘢事？筆者幾年前曾經戒煎炸、戒甜嘢、戒牛……基本上淨係食飯同菜，啲暗瘡咪一樣爆到嘭嘭聲。

6.「唉！我近排都狂爆咗瘡啊，你睇吓……」（其實得嗰一兩粒）如果你呢個舉動係想安慰我嘅話，我多謝你。但其實我真正嘅感受係，如果我塊面有你咁滑，我已經可以去還神。

 
如果你真係想關心爛面嘅朋友，我勸你都係咩都唔好講，因為講咩都唔啱聽。不如幫佢搜羅啲有效嘅產品，又或者直接介紹個好嘅皮膚科醫生俾佢吧！最後送上神曲〈死啦啲青春痘〉，祝願大家早日同爛面講拜拜！
 

 資料來源：新Monday
 


[圖擷取自網路，如有疑問請私訊]