同男朋友加埋月入20萬. . .但佢竟然為左5蚊同我鬧交...係咪我太港女??

少少背景: 同男友拍拖年幾. 大家3X歲, 搵錢差唔多, 都係專業人士. 錢, 大家都唔缺. 不過大家價值觀差唔多, 應洗得洗, 好慳家. 一齊住, 層樓佢既, 已經供斷. 協議我照顧佢起居飲食(一日三餐+所有家務)同埋我會幫佢做少少公事(佢因而請少一個PART-TIME), 而佢就包我食住(我唔駛交租水電煤, 超市出街食飯佢全包, 因為大家都唔追求物質所以都係有限錢)



.同男友相處基本上係舒服既, 大家生活上都依賴大家, 除左返工所有時間都一齊.但係我地成日為一樣野而鬧交.呢樣野就係我地成日為左幾蚊至幾十蚊鬧交 (無錯, 係幾蚊至幾十蚊, 而我地兩個人加埋月入差唔多廿萬).最近一次鬧交係為左$5. 有日我地出街, 佢話口渴所以泊架車去便利店買野飲 (佢自己買俾自己飲, 我唔口渴). 俾錢時, 我見收銀有包朱古力, $5, 就順手拎俾男友叫佢一齊俾錢. 佢一口拒絕, 話 "你自己想食, 你自己買", 然後質番包朱古力俾我. 我以為佢講笑, 就話"咪玩啦, 我個手袋係車, 身上冇錢" 就擺包朱古力係佢支飲品上面, 諗住佢一齊俾錢啦. 點知佢最後只係買自己支飲品. 行出便利店, 我好嬲問佢 "$5咋喎? 你都唔肯俾?" 佢話"唔係$5既問題, 係原則問題" 於是大家冷戰 (其實係我嬲佢, 所以冇睬佢).我自己覺得:其實我唔係一定要食朱古力, 只係佢話口渴先停車去便利店, 陪佢入去買野(所以我自己冇拎手袋, 放係車入面).見到有包朱古力忽然口痕叫佢買. 只係$5之嘛, 平時出街食飯都係佢俾曬錢, 反而一包$5朱古力講乜鬼原則呀?



我都唔知自己太港女, 定係佢太講原則.呢D事, 唔止發生一次. 不過之前多數都係因為禮物而鬧交, 唔係食物.平時佢乜節日都唔慶祝唔會送禮物俾我, 佢話送黎送去冇意義.但我平時聖誕生日出差都會買禮物俾佢, 有次佢見我去歐洲出差叫我幫佢阿媽買個銀包做生日禮物, 買左俾佢佢又冇主動俾番錢我, 我當自己買黎送俾佢阿媽(我唔識佢阿媽架).我地都唔追求物質, 所以冇叫過佢買貴重野俾我(我都知佢唔會買貴重野俾我). 不過有時我想嗲佢, 有次去開超市買野, 臨俾錢時見到個EMOJI公仔, $30咋, 多口叫佢送, 佢話唔送. 我問佢點解$30都唔送, 佢話我咁大個人唔需要一個EMOJI公仔. 我堅持話想佢送, 佢堅持唔買, 最後又鬧交...真係成日為左少少錢而鬧交, 平時食飯幾百蚊佢照俾又OK. 有次我幫佢公司做野因太花時間所以照市價收佢7萬人工佢都OK. 但係為左幾蚊, 我地都唔肯 let go. 我地自己各有原則, 有時懷疑大家都係痴痴地線.


[圖擷取自網路，如有疑問請私訊]