舒適堡試玩...每個月 $95 試玩 2 個月，結果要連續逼簽 24 個月分期

:0:0

話說小弟上星期喺灣仔天橋行緊嘅時候，有個女 sales 楚楚可憐嘅樣話要食飯、追單，話自己做緊某間喺香港有 9 間分店嘅大型健身房嘅 promotion ，適逢公司成立 X 週年（心諗︰日日都有咁多公司成立幾多幾多週年），會送我 7 日 V.I.P. 會籍，可以隨時上去做 gym 、焗桑拿、沖涼等等。我自己都有做開 gym ，如果係免費咁著數又真係想試下，雖然都預咗佢地會 sell 一大堆野，最後先肯送個 7 日 V.I.P. 會籍，但估唔到，過程比我想像更恐怖！我自己相信唔會因為佢 sell 而隨便俾錢（根據黃洋達某集節目講，呢D人仆梗街！），所以就跟咗佢落橋入去個健身房。入到去之後，佢地首先搵咗個教練同我做番個基本身體測試。雖然個結果絕大部分項目都係「normal」（其實自己已經幾滿意），雖然性別已經輸入咗做 male ，但對方仍然聲稱咁樣樣係唔夠好。

之後教練又帶我去做重力運動嘅健身設備，但做嘅過程中只係不斷話我用錯力、完全做錯曬，過去幾年做 gym 係白費曬、等於冇做過。俾個教練講完之後，終於到女 sales （後稱「V小姐」）發力嘅時候！ V小姐睇番數據都話我過往果幾年做 gym 完全冇效果，喺佢地果度做，一個星期都見效。之後，佢就 show 咗幾個價錢出嚟，首先係一個一次性嘅入會費 $1498 ，之後每個月月費係 $699 ，合約期可以揀 24 / 36 / 48 個月。我第一時間已經同 V小姐講話呢個價錢我 afford 唔到，始終區區大學生都仲讀緊書，頂多大概每個月百幾蚊。 V小姐︰「而家做緊大學生優惠，個入會費可以免咗，月費方面亦會減到 $599 。」我︰「仲有冇得再平？」 V小姐︰「一係你俾張信用卡我睇睇，我幫你睇下仲有冇優惠。」
於是我只係 show 一 show 張卡俾佢睇，之後佢就入辦工室同另一位男同事（後稱「M先生」）一齊出嚟。 M先生︰「如果係咁呢個價錢（減到去每個月$399）已經係最低架喇！你喺出面連康文署都搵唔到！即係你冇理由去麥當勞用 $15 買 $22 餐架嘛！」我︰「但係我仲讀緊書，呢個價錢真係 afford 唔到，我亦都有同果位女同事講。」 M先生︰「或者先生你每個月最高可以供嘅款係幾多？」我︰「大概百幾蚊啦。」 M先生︰「你唔好玩啦，定係你覺得我地呢度只係值呢個價！？」我︰「我冇咁嘅意思，我只係話自己負擔唔到。」之後 V小姐入返辦工室，帶埋另一位自稱係信貸部嘅男同事（後稱「B先生」）。

B先生︰「你好，我係信貸部嘅同事，睇番先生你而家呢個狀況，其實可以幫到你……」我︰「其實我入嚟係因為你地出面話有 7 日 V.I.P. 會籍送，當然我都會有興趣聽下你地嘅 promotion ，但起碼等我免費試玩咗，價錢又 okay ，我先會想 join 你地會員。」 M先生︰「或者如果你想試玩，可以試下我地另一個 12 個月嘅 plan ，價錢都係一樣。」我︰「問題係個月費我覺得太高嘛。」 M先生諗咗好耐，之後話︰「一係 6 個月，冇得再短架喇！」我︰「我諗起碼都俾我免費試玩咗先可以決定。」 M先生又諗咗好耐，之後講︰「嗱，真係冇得再抵架喇，玩 2 個月，每個月供 $95 。」
咁講真，呢個價錢我又真係接受到，但小心為上，我再問清楚︰「咁係咪即係我俾每個月 $95 ，就可以玩 2 個月？」 M先生即刻俾張紙我講︰「係，應該唔駛再考慮啦？麻煩你俾張身分證同 credit card 我，同填寫番你個地址。」我覺得太快，所以要求佢出返個詳細收費表，又問佢係咪呢兩個月會自動轉帳定係點， M先生已經好唔耐煩，就話︰「係自動轉帳！嚟緊呢 2 年分 24 期俾。」哇，好在問多次啫，佢所謂嘅每個月供 $95 ，就係講緊可以玩 2 個月，但要攤分 24 個月嚟供款！？我︰「嘩，你而家先講？咁咪好貴？咁如果我想玩多 2 個月，咪要分 4 年嚟還？

我玩 6 個月，咪要成 6 年先可以還清！？」 M先生︰「呢個 2 個月係冇合約嘅 plan ， total $2275 ，正話已經講得好清楚！呢個價錢分 24 個月俾，咁每個月咪 $95 囉，明唔明白呀！？已經好抵架喇！先生你岩岩又話供款問題，咁而家每個月 $95 ，仲有咩問題呢！？」（明明我未聽過呢個銀碼，肯定冇講過！）我︰「咁呢個我都知，我都識數學嘅，個分母越大，你每個月俾嘅錢就一定越細架啦！你分十年嚟還，每個月可能只係俾幾蚊添！」 M先生︰「醒目！唔岩咁吖，我俾個買一日送 24 個月嘅 plan ！咁就仲抵啦！」（開始語無倫次） B先生︰「係囉，或者買一日送 12 年嘅 plan 都得架！」我︰「個問題係我想知我最後 total 要俾幾多錢。
如果要 $2275 咁就算啦，我 afford 唔到。」 M先生同 B先生都走咗，之後 V小姐突然發脾氣，鬧我︰「你係咪玩我地呀而家！？我地咁有誠意想幫你，但我係完全睇唔到你有誠意想做囉！就算送個 V.I.P. 會籍俾你又點？你都冇誠意！我話俾你聽，我做好多大學生客，你係第一個令我完全唔想做你生意嘅人！搞咗咁耐就係喺度玩我地！」我︰「喂，似乎係你地玩我多啲喎，我一開始係俾你地同事拉入嚟，就話咩成立幾多週年，會送 7 日 V.I.P. 會籍，我先入嚟聽下，結果講咗咁耐都冇話送嘅。」 V小姐︰「喂，你小心D講野喎！我地幾時有玩野呀！？我可以告你誹謗！我地有話唔送咩！？」我︰「我有講錯？你地唔係玩我？又話送，跟住又嚟個信貸部嘅人嚟，結果都冇送，唔係玩我咩？」 V小姐︰「你係咪要 V.I.P. 呀！？係就攞張身分證出嚟啦！」（態度極惡劣）我︰「算啦，你而家都咁樣樣嘅態度喇，我而家走就算啦。」 V小姐︰「喂，呢D野冇得就咁算架喎！你自己搞清楚， 18 歲架啦（其實 20 ），講野可唔可以用下個腦，而家係你有問題，我地想幫你，我地從來都冇玩過你！」我冇理到佢，之後就走咗。

喂，真係好彩自己都幾小心，用「每個月 $95 ，可以玩 2 個月」嚟 sell 一個仲讀緊書，冇咩收入嘅學生，仲要我之後果 24 個月都要好似電話費咁交錢？各位真係要小心、小心同小心！

VIA:http://www.daliulian.net/cat99/node530381#6301

[圖擷取自網路，如有疑問請私訊]