【靚一世】Honda Civic SiR(EG6)& Civic Ferio SiR(EG9)

Photos & Video: Suzuki Production對第五代本田(Honda)思域(Civic)「起痰」或仲好有feel嘅車迷,其實都係鍾意佢三個優點,夠輕/操控好、有得爆TEC、又或者好似我咁,鍾意佢靚,好滑溜,好襟睇。 第五代Civic,喺91年至95年推出,已經係22至26年前嘅車,一般人已覺得佢好舊,我亦覺得唔應該將EG Civic太過神化,喺2017年嘅今日,講到佢天上有,地下無,畢竟,EG年代嘅Civic科技同製車技術,基礎係來自八十年代末、九零年代初。喂!廿幾年,個世界變咗好多架!

無論係唔係鍾意Honda嘅都知,廿幾年前嘅Civic嘅車架抵禦力的確麻麻,公主道、屯門公路、彩虹交匯處天橋,有過幾多單「大嘢」同EG Civic有關,你如果記性唔係差到離晒大譜,應該仲有少少印象。「阿John,揸車吓吓諗住會死,你實一定死硬囉!」好在,同大部份現今仍Keep住EG,包括今次兩部Civic嘅車主,佢哋揸車都好有分吋,絕對唔係「為求喺山頂落灣仔要快過人,講得出我命都可以唔要呀」嗰一類。

我哋喺一年多之前,曾經介紹過Civic Ferio SiR(EG9),所以今次先想講講呢部紅色Civic SiR(EG6)。呢款三門掀背Civic「大Tec」,當年冇行貨,呢部車係95年製造,99年在港登記出牌。我喺2006年三月初,喺日本揸過一部相近年份嘅,好原裝,嗰部車屬於我父母一位在日經常嘅台灣朋友。

喺11年前,EG6仍然喺「十鬆歲」嘅日本車,引擎仲好爽,運轉好有勁,傍晚喺橫濱附近嘅高速公路同巿街道大油轟咗幾轉,時間唔算長,但印象好深刻。嗰部EG6係原裝懸掛,有啲軟,行程比我想像中長,尤其車尾,你快扭入彎再繼續篤住油,車尾好似有啲浮升,但其實唔係,佢仲幾貼服;而整體嚟講,四個轆都好似貓仔咁,伏在油木地板上,但車架卻唔會好似EK9 Type R咁硬。呢種懸掛調校上嘅取向,其實有少少法國車味道。你有興趣睇睇本田喺70年代到80年代,點樣參照歐洲同級車設定懸掛,建議你買本日本三樹書房(Miki Press)出版嘅《ホンダシビック(Honda Civic)−英雄の登場−》睇睇。(http://www.mikipress.com/books/1992/12/post-82.html)

如果撞車係唔會死人嘅,我寧願揀EG Civic呢種設定,懸掛軟糯之中又好夠支承力,而且行程比EF年代Civic長,我Like。睇過部份日本行家嘅著作,EG Civic轉用較長行程嘅懸掛系統(三門版),係配合出口歐洲(尤其係英國)巿場所需,因為當地好多二級、三級公路都係起伏或鋪裝不平嘅道路,呢種路況其實同香港不謀而合。


今次試揸嘅紅色EG6,曾經喺今年7月嘅EK9 Civic Type R專題現身,當時仍然好原裝,我好似聽講車主講,話原裝避震喺過彎傾側方面大咗啲,套brake唔多夠收。事隔約兩個月,今次再揸,佢已換咗TEINSuper Street系列,制動亦換上來自EK9 Civic嘅部件,同埋來自Prelude波棍頭。我最初擔心換咗TEIN之後,會好「跳」,但揸落估唔到幾好,唔會太硬,仲有合理嘅柔韌,車主亦刻意調校到同原裝懸掛相同高度。制動表現係唔係好咗好多呢?的確係,畢竟原裝EG6同EG9嘅原裝Brake都係「唔夠收」,如果揸慣現今嘅Hot Hatch,再跳上EG6,包你忍唔住想upgrade。

近期EG又再成為模型車製造商嘅焦點,除咗因為EG喺賽車場嘅戰績,我覺得同佢外形襟睇好有關,滑溜溜,好有concept car味道,就好似同期嘅萬事得第三代RX-7(FD3S),恕我得罪EK fans,EK嘅「美人度」真係同EG差一大截呀!陰功!

我細個好like三門掀背EG,隔嚟女校有位老師,朝朝由老公揸住部三門EG送返工。嗰時覺得四門EG唔靚,哈哈!諗返真係唔識貨。但人大咗,逐漸明白到五門掀背車同四門房車嘅好處。喺性能層面睇,Civic Ferio SiR(EG9)雖然冇EG6喺窄彎咁矯捷靈活,但車尾真係安定、穩定得多,尤其是喺頭轆抓著力靠近極限嘅時候。我無法將EG6同EG9帶去賽車場做A、B對照,我亦冇中子修或泰國車神拿達活嘅駕駛技術,我只係純粹以個人口味評價:EG9係易揸得快,快揸時更有信心。好歡迎你發表意見呀!







EG9後排只有兩個座位,係唔係抄BMW E34 M5或Mercedes-Benz 190E 2.5 16 EVO II就唔知喇,但喺廿幾年後睇返,本田真係好有心將EG9塑造成一部高性能Civic(以當年標準而言)。

引擎呢?點講睇咗咁耐都唔講引擎?SiR嘅170匹VTEC機器,係要嚟feel嘅、聽嘅同埋「轟」嘅,希望你都可以盡快親身feel吓或再feel吓。Honda Civic SiR(EG6)規格車型:三門掀背四座體積:(長)4070mm x (闊 )1695mm x (高)1350mm軸距:2570mm跨距:(前)1475mm(後)1465mm引擎:1595c.c. B16A型直列4汽缸雙頂凸輪軸16活瓣,前置引擎口徑 x 衝程:81.0mm x 77.4mm壓縮比:10.4:1燃油供應:電子燃油噴注(PGM-FI)馬力:170匹/7800rpm扭力:16.0kgm/7300rpm波箱:5前速手動,前輪驅動波箱傳動比:1波:3.230;2波:2.105;3波:1.458;4波:1.107;
5波:0.848;最終傳動比:4.40懸掛:(前)雙搖臂;(後)雙搖臂制動:(前)透氣碟;(後)實心碟車重:1050kg(有動力輔助轉向/風油軚);1090kg(有天窗有動力輔助 
轉向)耗油:13.4km/L(10 Mode-日本運輸省1991年審查值)最少迴轉半徑:5.3米50km/h制動至停止:14米(配ABS 13.5米)油缸容量:45公升輪胎:(前、後)195/55 R15 83VHonda Civic Ferio SiR(EG9)規格車型:四門四座體積:(長)4395mm x (闊 )1695mm x (高)1375mm軸距:2620mm跨距:(前)1475mm(後)1465mm引擎:1595c.c. B16A型直列4汽缸雙頂凸輪軸16活瓣,前置引擎口徑 x 衝程:81.0mm x 77.4mm壓縮比:10.4:1燃油供應:電子燃油噴注(PGM-FI)馬力:170匹/7800rpm扭力:16.0kgm/7300rpm波箱:5前速手動,前輪驅動波箱傳動比:1波:3.230;2波:2.105;3波:1.458;4波:1.107;
5波:0.848;最終傳動比:4.40懸掛:(前)雙搖臂;(後)雙搖臂制動:(前)透氣碟;(後)實心碟車重:1110kg(有動力輔助轉向/風油軚);1130kg(有天窗有動力輔助 
轉向)耗油:13km/L(10 Mode-日本運輸省1991年審查值)最少迴轉半徑:5.4米50km/h制動至停止:14米油缸容量:45公升輪胎:(前、後)195/55 R15 83V


[圖擷取自網路,如有疑問請私訊]

本篇
不想錯過? 請追蹤FB專頁!    
前一頁 後一頁