【MenClub讀者直擊】德國Mazda博物館 常設展品冠全球

Text: John Kai Chin ChanPhotos: Charles TangMenClub喺5月中報道,位於德國奧格斯堡(Augsburg)嘅Mazda博物館(全名為Mazda Classic Automobil Museum Frey)正式開幕。 當時我哋話呢間館藏品僅次於日本廣島「總壇」,呢句話,嚴格嚟講只啱一半,因為以常設展品數目,奧格斯堡Mazda博物館比廣島至少多4倍。 MenClub讀者Charles Tang喺6月中到德國自駕遊,其中一站就到咗奧格斯堡(Augsburg),奧格斯堡位於慕尼黑(Munich)西北部,距離車程約90分鐘。

Charles係日本車迷同意大利車迷,過往亦擁有過萬事得屬下高級汽車品牌俊朗(Eunos)500。出發前已慷慨答應為MenClub拍攝館內名車。 Mazda Classic Automobil Museum Frey創辦人Walter Frey現為德國萬事德分銷商,據佢早前接受英國汽車雜誌《CAR》訪問中表示,60年代接受汽車維修訓練時,接觸轉子引擎(Rotary Engine)技術,自此就迷上萬事得汽車,過去40多年來,收藏咗50多部不同年代嘅萬事得汽車。
Walter Frey(中)與兩位兒子Markus(左)及Joachim(右)Photos: Mazda Germany


 1950 【GB系列三輪貨車】萬事得最早大量生產嘅汽車,就係呢類三輪貨車。據悉,早喺二次大戰爆發前,上海租界已有萬事得三輪貨車行駛,喺相近時期,澳門運輸界亦出現呢款萬事得。GB系列配700c.c.單汽缸四衝程引擎,最大馬力9.5匹,貨斗只能負重500kg,極速45km/h。二次大戰後,日本及東南亞巿場對呢類貨車需求殷切,廠方提升旗下三輪貨車性能,行生品種與級別增至30多種,負載量由300kg至2000kg,適合唔同行業及買家,最好賣嘅日子,年銷約13萬部(本土及海外)。

1962 【K360】呢類360c.c.三輪貨車仔,喺60年代嘅日本多的是,當時有6家生產商製造。358c.c.雙汽缸二衝程引擎,最大馬力11匹。由1959年生產至1969年,總產量約28萬部,廠方亦有授權南韓起亞(Kia)喺當地生產「韓版」。

1962 【R360 Coupe】萬事得第一款四輪汽車,356c.c.雙汽缸引擎,最大馬力16匹,極速85km/h。當年已廣泛應用鋁合金同鎂合金,車重只有380kg,據講係60年代嘅日本慳油車,生產期由1960年至1969年。R360 Coupe係萬事得轉子引擎之父——山本健一首部設計嘅四輪汽車。

1962 【Carol P360】Carol P360係60年代初嘅日本K-Car,當時K-Car引擎容積上限係360c.c.,唔少同級對手都配二衝程嘅雙汽缸引擎,但萬事得已為此車配358c.c.四衝程四汽缸OHV引擎,最大馬力18匹,廢排更低,有更佳低扭。極速85km/h,生產期由1962年至1970年。Carol係萬事得K-Car車系中堅,90年代初本港代理曾引入一部來港試探巿場,唯最終未有正式大規模銷售。

Photo: Mazda Japan90年代初本港代理曾引入一部第二代Carol來港試探巿場,唯最終未有正式大規模銷售Photo: Mazda Japan
1966 【Bongo】MenClub喺今年年初介紹過Bongo,Bongo係萬事得貨車、客貨車中堅車系,一直生產至2012年,總計四代。呢部「單屋」貨斗版,配782c.c四汽缸引擎,最大馬力37匹,載貨量最高只有500kg。圖中呢款嘅生產期由1966至1975年,留意佢係後置引擎,後輪驅動。喂!擺嘢唔夠方便喎。


1966 【1000 Coupe/「323 Coupe」】1964年東京奧運前後幾年,日本湧現大量新款家庭房車及轎跑車。萬事得喺1966年推出Familia車系,即是後來嘅出口323車系。第一代Familia設有房車、轎跑同旅行車三種車型,1964年穩佔全日本3成同級車巿場。1000 Coupe生產期只有兩年(1965-1967),呢款車外形設計受到當時意大利車影響(社史係咁寫)。985c.c.四汽缸高扭力引擎,加上只重790kg,極速可達145km/h,60年代日本同級中極速Number One。


1968 【Cosmo Sport 110S】世界首部雙轉子引擎汽車——Cosmo Sport 110S喺1967年5月30日發表,距今剛好50年。「Cosmo」喺當時車廠旗艦,修長車身及兩座位佈局非常之有科幻味道,佢嘅雙轉子引擎,491c.c. x 2,最大馬力110匹(後期型增至128匹),極速185km/h,生產期由1967年至1972年。「Cosmo」總產量1176部,係萬事得當年嘅「生招牌」,曾出口至美國、英國、法國、挪威、荷蘭,以至泰國都有。


1971 【R100】萬事得喺 60年代末大舉將旗下中高檔型號「轉子化」,R100係RX系列誕生前嘅轉子中堅,有房車及轎跑版,配100匹491c.c. x 2雙轉子引擎,極速達180km/h。第一代由1968年生產至1973年,總產量約10萬部。R100曾出戰1969及1970年比利時斯帕(Spa)24小時賽,亦曾贏得1969年新加坡格蘭披治大賽(性質與澳門格蘭披治大賽相近,有興趣自己上網摷吓)。
1971 【RX-2】RX-2,日本國內稱為Capella,喺部份出口巿場(例如美國)配搭傳統往復式機器,稱為616。RX-2配第二代轉子引擎,容積573c.c. x 2,最大馬力120匹,極速190km/h,廠方為引擎提供40,000km保養。生產年度由1972年至1978年。

1972 【Pathfinder XV-1】60年代中期,萬事得喺多個國家設立組裝線或生產線。呢款Pathfinder唔會喺萬事得正式社史搵到。佢喺為緬甸政府設計及製造嘅一款軍車,供當地警察及軍政部門進入山林地帶之用,設有軟篷,可載九人。四汽缸引擎,容積不明,最大馬力90匹,極速100km/h,生產期由1970年至1973年。時至今日,喺仰光仲可以見到呢啲Pathfinder,不過,已經被平民購入。
1974【Rotary Pick-up】轉子Pick-up,咁嘅idea都幾癲,呢款車總產量16,272部,全部銷往北美,當中有600部係拖車。配135匹13B轉子引擎。據知,呢款車加速快應好快,但亦好大食,用佢嚟做拖車生意,隨時賺埋都唔夠入油。
1975 【RX-3】RX-3最為人熟悉係佢喺全日本房車錦標賽擊倒Skyline GT-R連勝紀錄。RX-3有雙門轎跑、四門房車及旅行車。配12A系列 573c.c. x 2雙轉子引擎(早期版配10A),最大馬力95匹,極速175km/h,生產期由1971至1977年。1975 【RX-4/Luce AP】RX-4走中檔行政級路線,同樣有雙門、四門及旅行車版,日本稱為Luce。配當時最新嘅13B系列654c.c. x 2轉子引擎,最大馬力115匹,極速185km/h。呢部RX-4配備稱為AP(Anti-Pollution)嘅新技術,係第一款通過1973年日本新廢排標準及1975年美國新廢排標準嘅轉子引擎汽車。呢代RX-4總計賣出22萬部。
1975 【929】929曾經係萬事得旗艦高級房車。呢款70年代銷往歐洲嘅929,其實即係RX-4嘅往復式傳統引擎房車版,配1970c.c.直四引擎,90匹馬力,極速160km/h,生產年期由1972年至1978年。
1976【Parkway】萬事得喺1973石油危機過後,極力降低轉子引擎耗油量及試圖擴闊應用層面,當中包括呢款Parkway 26座小巴。配13B系列654c.c. x 2雙轉子引擎,最大馬力135匹,極速120km/h,一度係全球最快嘅小巴;另設13座位版,座椅大大張,sell豪華。


1977 【RX-5/Cosmo AP】RX-5擺明走豪華GT(Gran Turismo)路線,引擎馬力輸出與RX-4相同,但喺氮氧化物(NOx)排放量進一排減低,擺脫最早期轉子引擎高耗油及高廢排嘅缺點。生產期由1975年至1978年。
1977【323】福士第一代Golf喺歐洲掀起Hatchback浪潮,萬事得睇準歐洲汽車用家鍾意大掀背尾門,特別喺1977年發表嘅323,增大尾門面積,進一步方便提存行李。呢代323亦係最後一代採用FR驅動佈局。配1272c.c.直四引擎,60匹馬力,極速140km/h。生產期由1977年至1980年。323喺德國係暢銷型號,25年來賣出約80萬部。
1984【RX-7(SA/FB)】第一代RX-7喺1978年推出,代號SA或FB,展館中有兩部,綠色屬前期型,銀色屬後期Turbo版,香港有少量Turbo版。MenClub將於短期內試揸一部第一代,該部車屬1985年最後一批出口版。
1987【323 Cabriolet】80年代四座位大眾化售價開篷車熱賣,講句老實話,323 Cabriolet都係食住Golf Cabriolet條水,人出我又出,但無所謂,323 Cabriolet喺歐洲、北美同亞太區都好好賣。配1.6公升直四引擎,85匹馬力,極速185km/h。
1989【RX-7 Cabriolet(FC)】1985年發表嘅第二代RX-7,代號FC,細分前(85-88)、後兩期(89-92),1987年德國法蘭克福車展(IAA)發表開篷版,呢部89年製造嘅Cabriolet,設有電動開關軟篷,配13B單渦輪增壓雙轉子引擎,最大馬力200匹,極速230km/h。開篷版生產至1992年。FC總產量約272,000部。

1990【MX-5(NA)】大半個80年代係英式廉價雙座位開篷跑車(Roadster)嘅低潮,萬事得夠膽喺1989年踩入呢個外界極唔睇好嘅market,推出MX-5,從此一鳴驚人。「五仔」迄今發展至第四代(ND),售出超過100萬部,喺健力士世界紀錄大全留名。第一代(NA)配1598c.c.直四引擎,FR佈局,五速棍波,出口版115匹,極速195km/h。1991【Astina 1.8 GTi/323 F】80年代係跳燈跑車嘅黃金年代,但想擁有一部跑車談何容易。萬事得喺1989年發表Astina 1.8 GTi/323 F,五門掀背車修長格局,又有偏斜車頭同跳燈,頂級版配1.8公升直四機器,131匹,極速201km/h。九零年代初有唔少香港中學教師都揸呢款車。1992【AZ-1】第一代MX-5開發總監平井敏彥(Toshihiko Hirai)喺1991年東京車展,發表另一部震撼作——AZ-1。AZ-1係K-Car跑車,雛型早見於1989年東京車展,有多個概念版本。生產版配657c.c.直三Turbo引擎,64匹。鷗翼式車門令成本大增,再加上推出時正值日本泡沫經濟爆破,銷情極差,總計四個生產年度,只賣出4392部。不過,四份一世紀之後,AZ-1喺街依然超高收視。
1992【RX-7 (FD)】萬事得喺1991年6月贏得法國Le Mans 24小時賽,同年12月發表代號FD嘅第三代RX-7。FD被視為最性感嘅RX-7,配13B-REW嘅654c.c. x 2雙轉子Twin Turbo引擎,日本版最大馬力255匹,出口版輸出馬力由238匹至240匹。尾期版增至280匹,2002年停產。
1992【Eunos Cosmo】Eunos Cosmo係車壇唯一一款配3轉子引擎(654c.c. x 3)嘅巿販型號,喺Twin Turbo配合下,最大馬力280匹(日本傳媒喺馬力機測試過,達300匹),扭力達41kgm。Cosmo車廂極之豪華,配意大利名牌高級真皮座椅,頂級版配有當時仍非常新穎嘅衛星導航系統及彩色小型電視,總之就極之豪華。Eunos Cosmo只作本土銷售,1990年香港代理曾引入一部作營銷研究之用,據悉若當年在港發售,定價至少達100萬港元。傻啦!邊會有人買。
1992【Eunos 30X/MX-3 V6】萬事得喺80年代末於日本及香港推出高級品牌俊朗(Eunos),30X屬2+2佈局前驅轎跑,配1.8公升V6自然吸氣引擎,最大馬力135匹,極速202km/h。採用V6引擎,取其幼滑同寧靜嘅運轉表現,呢款機器係當時全球最小容積嘅V6機器。1993【MX-6】FD RX-7、NA MX-5、MX-6、30X(MX-3)都係90年代萬事得靚絕嘅跑車,MX-6真車靚過上鏡,車身線條修長內歛,唔會好似FD RX-7刻意賣弄性感。MX-6雖然係Coupe,但車廂空間算幾充足。筆者幾年前喺香港試揸過一部紅色直版2.5 V6棍波版,170匹引擎仲算幾滑溜,中段加速凌厲。間中仲可以喺西九龍見到佢。1993【Eunos 500/Xedos 6】俊朗500,走中、高級小型房車路線,定位其實幾狹窄,當年香港車價約32萬元。相信仲有香港車迷記得。配2公升V6自然吸氣引擎,160匹馬力。Eunos 500有輸往歐洲,亦曾短暫出戰英國房車賽(BTCC),唔信?上網Search吓。
1993【323 GT-R】323喺80年代中晚期活躍於世界越野錦標賽(WRC),期間為獲得型號認證(Homologation),推出咗多款高性能街車,例如1992至1993年生產嘅323 GT-R,配1.8公升(1840c.c.)Turbo引擎,185匹,五速手波四輪驅動。
1994【121】仲記唔記得121個廣告,樓下洗洗吓車,樓上倒桶水落嚟?踏入90年代初,萬事得全線車系外形出現破革設計,變得圓碌碌,滑溜溜。1990年發表嘅121被喻為當時日本最cute嘅四門小車,佢平,車身panel唔算實淨,但內外設計過癮,亦有俗稱罐頭頂,可以三段移動嘅canvas top車頂。1324c.c.直四引擎,72匹馬力,極速155km/h。
1995【Eunos 800M/Xedos 9 Miller-Cycle】Eunos旗艦800M,採用稱為米拿循環(Miller-Cycle)嘅2.3公升超級增壓V6引擎,日本版最大馬力220匹,出口版馬力介乎203匹至210匹。米拿循環設計早於40年代末嘅美國航運界。800M嘅米拿系統,透過較長時間嘅活瓣開放時間,加上超級增壓器嘅配合,做到比同級引擎低耗油及低廢排。800M採用嘅雙螺紋(Twin Screw)式增壓器由IHI設計及生產,呢種型式嘅超級增壓器後來被應用至平治C 32 AMG嘅3.2 V6 Supercharged引擎。2003【Roadster Coupe】只此一次,日本國內限量生產200部嘅「天生硬頂五仔」,好多MX-5/Roadster fans千方百計都想買到手(可惜唔係咁易)。Roadster Coupe建基於NB底盤,由萬事得特種車部門加裝固定硬頂,與同期MX-5共用160匹1840c.c.直四引擎,極速205km/h。



博物館門票方面,成人5歐元、13至17歲或長者2.5歐元、12歲或以下免費。逢星期一休館、星期二至日開放時間,由早上十時至下午六時。網址:http://mazda-classic-frey.de/en/


[圖擷取自網路,如有疑問請私訊]

本篇
不想錯過? 請追蹤FB專頁!    
前一頁 後一頁