(真實對話) 前日去左試玩舒適堡「500蚊三個月任做」計劃，佢用咁既方法屈我去 join個3萬幾蚊既plan ...

:0:1

(黑店) 前日去左試玩舒適堡「500蚊三個月任做」計劃，佢用咁既方法屈我去 join個3萬幾蚊既plan ...
今日同朋友講起做Gym，令我諗返起前排因為一個朋友為咗join個試玩plan而篤咗我個名同電話出嚟，之後當然係日日打嚟話有試做價優惠期有限又剩，當年仲係少年太年輕的我諗住500蚊三個月咁抵都一試無妨，話曬自從返咗工之後都冇咩機會做運動，唔join由至可，一join種惡果。依件柒事可以話係我人生入面其中一件黑歷史，講出嚟除咗係因為一吐鬱咗多年嘅怨氣，仲希望大家引以為鑑，唔好受騙。想唔想聽？想聽就繼續碌落去，好長，長過啲客俾錢我寫膳稿十倍！
準備好未？
嚟喇！
話說前日我睇見嗰間健身中心個試做優惠寫住「500蚊三個月任做，絕無額外收費」心諗都ok丫500蚊玩三個月，跑下步舉下啞鈴郁下！於是上去報名講個sales名出嚟諗住拎張試做證試玩，OK咪Join個長plan囉！點知個接待完全冇理我講咩就搵個六呎高嘅大隻佬嚟招呼我：「Hi呀師兄，我叫Alan，依便丫！」Alan，依個名我化咗灰都記得。

「咦有冇帶運動衫嚟？」
「有。」
「換咗衫先，你第一次嚟，我教你做幾嘢先！」
「哦好，唔該你……」

屌依家諗返起我講唔該真係好ON9。Anyway，當年未傳出健身中心極醜惡銷售手法，所以我完全冇防範，加上朋友冇賽後報告，當年一隻迷途小孤羊就咁上咗賊船。換咗衫出嚟，哇又多個大隻佬叫L佛：「嗨我哋會先教你做少少動作，等你可以適當咁運動」教埋我啲低能Sit up、Push up，推下機擘下腿，仲下下數住，深蹲30下一組做5組，逼到我爆曬汗攰到嘔泡，而我又唔知點解咁ON9要聽佢哋點，可能係因為俾兩個大漢牛咁眼望住，有壓力。

「咦師兄，你覺唔覺得自己行路個姿勢有少少偏左？」
「下…係咩？」
「係呀，應該係左邊肌肉唔夠，其實我好多『學生』都係咁！」
「係咩……」
「你嚟做Gym其實係想有D咩帶走？」
「做下運動，健康啲啫……」
「唔唔唔…明白，其實睇返啦，頭先你好多動作都唔夠力喎其實」
「咁…第一次做嘛……」
「第一次做都唔應該咁易腳軟喎！」
「Squat 30下一組，我做足5組喎……」
「咦師兄好似都有D研究喎！」
「以前打校隊都有啲訓練嘅…」
「咁師兄不如同你做個Body check，睇下依家個身體狀況點樣丫！」

嚟到依度，你一定會話理佢都ON9，鬼唔知係焗你入去怒Sell咩？不過我想講，做完50下push up、50下推胸、120下深蹲之後，HP見曬血、意志力仲跌到落腳趾公，我堅唔明點解嗰陣真係會覺得自己係因為唔健康所以唔夠力，而傻的嗎跟咗佢入玻璃房做檢查。磅下重、量下心跳血壓同疑幻疑真嘅脂肪比例之後，Alan就話去Print份報告出黎叫我等一等。一等就45分鐘，間房又凍，我又啱啱爆完汗，cool down咗之後勁凍……意志力幾乎跌到零，此時Alan先拎住兩頁紙斯斯然入返嚟：「喂Sorly呀，頭先有個學生整到，我去幫佢所以遲咗返嚟」屌你我明明見住你喺出面同幾個教練吹水吹到笑曬！

「師兄你睇！唔足磅、脂肪比唔夠、但係血壓又過高喎！」
「我做完一輪劇烈運動先入嚟body check會唔會唔準？」
「個個學生都咁講，但我同你講一定準！」
「咁…應該點做？」
「頭先睇咗你玩咗少少運動啦，可能太耐冇運動依家都幾生疏喎係嘛？」
「我少推機啫…」
「相信你自己都知自己爭啲咩想要啲咩嘅！」
「其實我真係冇乜要求，純粹想跑下步舉下鐵…」
「拿拿拿咁就錯喇，較為瘦削身形嘅朋友其實盡量唔好跑步，會愈跑愈瘦！我好多學生啱啱過嚟玩都會有依啲誤會，但係日子有功，佢哋依家個個都獨當一面，有兩個仲參加咗今年健美先生比賽。不過我又唔係要你練到好似Batman咁款，其實基本好似我咁已經ok，唔好睇我都算大隻，其實唔難，你肯花時間，你都可以變到我咁！再講丫，邊個唔想高大靚仔？我就唔靚仔喇，但你靚仔嘛，已經煩少咗樣，再齊埋件嘅話，真係殺曬！拿唔好話咩殺曬喇，就咁講話想睇起上嚟健康啲有力啲，唔係話有就有，都要下苦功，不過唔使擔心，我會幫你！只要肯操足三個月，包你型過我！」

「我…淨係得500蚊……」

「錢唔係問題，最緊要係幫到你，自己練一定練唔好，動作唔啱盞side咗時間同錢，再講，依度啲師兄個個都咁大隻，你入到嚟都唔敢玩啦！有我帶住好做好多！拿咁，我計計條數先，假設三個月內完成一個極速訓練，極速嚟講即係依個Advanced Plan，咁就依個價…high speed training嘅話…即係話…每日做兩Part，星期日休息嘅話…OK！依個價應該係最抵！」
「三萬八？我邊有咁多錢……」
「錢唔係問題，最緊要有效果嘛！我好多學生都會做循環貸款，聽佢哋講最高做到你人工八倍，睇師兄你一定唔止搵一萬啦？三萬八做fit個身形，你信我！三個月後你一定覺得物有所值！最緊要係健康嘛！講真丫，我個個學生都話冇時間做運動架啦，所以先嚟跟我操，Bump大啲肌肉，行出街自信都多啲，你睇我隻手臂！拿唔係好大，15吋到啫！摸下，堅料嚟架！」

「阿Alan哥，我可唔可以考慮下先……」
「冇時間考慮啦！你上得嚟就預咗攞返啲嘢走，係咪先？你真係以為自己喱埋做會有效果咩？你做一兩次覺得冇feel就唔做，到最後連嗰啲錢都蝕埋，老實同你講，公司就係靠賺依啲錢，唉我覺得好唔啱，係睇唔過眼先嚟幫你！拿你睇…依個係我學生，你睇佢幾大隻？不過唔講你唔知佢啱啱嚟嗰陣其實肥仔嚟架乍哈哈哈哈哈！跟咗我兩年依家都仲未斷，點解？就係因為有效果囉！」
「但三萬八…真係好貴……」
「錢唔係問題，最緊要有效果嘛！拿你唔使依家一次過俾曬嘅！你依家用credit卡落住一半訂先，其它嗰啲咪用循環貸款囉！我就唔信嗰三萬幾你攞唔到出嚟！信我，三個月後你一定覺得物有所值！講真丫，我個個學生都話冇時間做運動架啦，所以先將個責任跟俾我，我幫佢哋Bump大曬啲肌肉，行出街自信好多，你睇我舊胸肌！拿唔係好大，45吋到啫！摸下，堅揪架！你嚟都係想練好自己個Body啫！」

「其實我真係冇乜要求，純粹想郁下…」
「拿拿拿又錯喇！我好多學生初初嚟嗰陣都係咁諗，但你明唔明白有啲嘢你想得到就要付出架喇！日子有功，你一定有得著！我唔係要你練到好似The rock咁款，基本好似我咁已經ok，唔好睇我咁大隻，其實一啲都唔難！你肯花時間你都可以變到我咁！再講丫，邊個唔想高大靚仔？我就唔靚仔喇，但你靚仔嘛！煩少樣再齊埋件嘅話，不得了！拿唔好話溝唔溝死女，就咁講話想睇起上嚟健康啲有力啲唔係話有就有架，都要下苦功。不過唔使擔心我實磅住你！三個月！包你型過我！」
「Alan哥，我諗我真係要諗下先，依度真係好凍…我因為咁樣而冷親返唔工，我會投訴你哋……」
「唉OK…咁你再考慮下啦。依家等等先，我叫同事過嚟幫你做返張試用證。考慮下啦！最緊要有效果丫嘛傻仔！你睇你！咁瘦一啲霸氣都冇！行路又偏左，咁落去遲早左邊肌肉會萎縮架！街邊嗰啲阿伯行路拐下拐下就係因為咁！你自己諗下啦！連你自己都唔爭氣，仲有邊個幫到你？」
[size={defaultattr}]

来源：www.google.com.tw

[圖擷取自網路，如有疑問請私訊]