TVB御用「走佬阿媽」：韓馬利！

:0:1

小編發現，喺之前嘅11年，韓馬利Mary姐前前後後喺TVB劇入邊，共拋棄咗10個仔女，堪稱TVB史上最狠心嘅「御用走佬阿媽」！！

【Mary姐拋棄子女全紀錄】2003年：《衝上雲霄》棄：吳鎮宇2003年：《智勇新警界》棄：馬德鍾2008年：《甜言蜜語》棄：徐子珊2010年：《囧探查過界》棄：鍾嘉欣2011年：《洪武三十二》棄：馬德鍾2012年：《On Call 36小時》棄：楊怡2012年：《幸福摩天輪》棄：陳智燊2012年：《法網狙擊》棄：森美2013年：《情逆三世緣》棄：關詠荷2015年：《師奶Madam》棄：蕭正楠

【馬德鍾最慘被棄2次】第一宗棄兒劇，就系03年嘅《衝上雲霄》。當時Mary姐狠心咁掟低咗Sam哥（吳鎮宇），跟住就開始咗佢嘅漫漫拋棄仔女之路。當中馬德鍾最慘，俾Mary姐拋棄咗2次，分別系03年嘅《智勇新警界》同11年嘅《洪武三十二》。

喺Mary姐咁多拋棄仔女戲碼當中，最經典莫過於2012年，喺同期播出嘅劇集當中，分別先後喺八點半嘅《幸福摩天輪》同九點半嘅《法網狙擊》拋棄咗兩個仔——陳智燊同森美。（編劇大佬真系夠狠心！一日到黑要人拋低個仔）

曾有記者問到Mary姐，關於成日做拋棄仔女嘅戲碼，佢笑下話：「有咁啱得咁蹺啫，羅樂林一日死5次都系咁啦！演員唔想失去每一個機會，只想豐富下自己嘅角色，希望做法唔一樣，有得俾你做，你唔做啊？」睇下Mary姐咁敬業嘅精神，就算編劇再要佢揼低啲仔女，佢都一樣咁steady啦！

【60歲Mary姐，23寸小蠻腰】

「甘草級」演員韓馬利，除咗系做走佬「叻」之外，60歲嘅Mary姐，喺現實中系舞蹈學院嘅CEO行政總監，而且仲系個名副其實嘅「舞后」，而家依然Keep住唔到100磅嘅體重、23寸嘅小蠻腰同Fit到爆嘅身材！（呢個身材，幾多妹妹仔拍馬都追唔上！）

3年幾前，Mary姐曾患上咗焦慮症，當時佢經常有幻聽、手震冒汗、呼吸不到嘅現象，多得啲姊妹嘅開導先逐漸痊癒。經過果場病之後，Mary姐學識自己唔系萬能嘅，「冇咗健康，有再多錢有咩用？我有焦慮症時成日跳舞發泄啲唔好嘅情緒，仲鍛鍊埋注意力，對克服呢個病有好大幫助。」

【麗的舞蹈藝員班出身，20年來身兼多職】中五畢業後，屋企人希望佢到加拿大升學，當時佢因為驚悶拒絕咗，之後報讀麗的電視（亞視前身）舞蹈藝員訓練班，畢業後就喺麗的跳咗兩年舞，之後由舞蹈員轉戰演員舞台。有咗咁紮實嘅基礎，60歲嘅Mary姐而家一樣咁跳得，芭蕾、中國舞、Hip Hop、Funky、Zumba等等，通通都難唔倒佢！早喺20年前開始，Mary姐已經keep住打兩份工，一系喺TVB做演員，仲有就系同朋友一齊經營美容院，同埋擔任跳舞學院嘅CEO，她喺訪問中透露，「當年我嘅好友鄭明明同我講，唔可以齋靠TVB一份人工，如果有一天公司唔同我簽約，咁點算？」之後Mary姐就不斷咁增值自己，除咗攞到國際美容師牌，仲相繼搞美容同跳舞學校生意。