【低處未算低】38.5歲中坑毒男的感慨！！

:0:0

有巴打開PO講35歲男單身聖誕，我同o個位c hing差不多，但我過了38個 lonely chrismas了。

我，基層公屋家庭出身，老豆老母都係盲字都唔識多個，老母做幾十年家庭主婦，仲有個弱智自閉細佬，幾十歲人出街一步都要接送。我除非中六合彩，否則冇可能買樓，而家仲同阿媽住緊間垃圾地段公屋。公屋雞髀論，未到見家長已感受到。細個時可能因為內向、唔識同人相處，加個樣有缺陷，在學校被欺凌排濟無日無之，1993年，勉強挨完中三，就半被逼咁冇鞋挽屐走，拎著中三程度入社會大學。輾輾轉轉超過10年，讀過十九工業學院(IVE前身)低級班(比HD、asso仲要低級)，做過隱青廢青，做過低薪垃圾工，死埋老豆，老豆走時乜都冇剩。直到2006年，27歲，去左某專上院校做office boy，間院校算唔錯，但入著個世紀大伏部門，但我都冇乜得揀了，一直至今，5天工作，銀行假，唔使太多OT(補time off)，挨左10年，終於有每年22日年假，同頂薪大約16K。對於我黎講，盡了。唔好同我講咩進修，我冇錢，英文又唔得；而且亦實在見過太多人，未進修做呢D工，進修完，又係做返呢D工。同埋正如雞髀論：係要讀書既，就正正經經CE AL/DSE上八大degree，唔係浪費金錢o係D十九二奶課程，有咁既錢不如儲錢買樓；又正如隔離post 35歲樓主，10年前，讀IVE pt HD到degree到master既錢，分分鐘夠畀當年新界西北二手私樓首期，如果佢當時用黎買樓，應該一早結左婚。講下感情：從來都係圈子窄，加上個樣畀人感覺好惡(唔只一個人咁講過我，未有八達通年代，試過o係巴士站，有人問其他幾個等車乘客唱散紙，問曬另外幾個都冇人啋佢，唯獨係唔問我)，都唔知點去識女。學校，中學係狗面歲月，正常講句說話都難；工業學院都唔係好好多，仲要全男班。返工，都係做最低級位，其他人除左叫我做野同鬧我，根本唔會同我有第三樣野講。有幾份比較多同級女同事既，又一係個個有仔，一係就第一日就唔妥我。而家呢份專上院校office boy，後生女同事係唔少呀，都試過睇o岩一兩個，不過先唔講係咪個個有仔，佢地一係clerk一係officer，OA同OL攪辦公室戀情？人唔笑狗都吠，MK型或者得既。同樣office boy既同事有兩個，一個係50歲既麻煩C9，另一個係大我兩年，剛4字頭既男人，同佢10年同事，從來未聽佢提過有女友或拍拖結婚，我好懷疑佢同我差唔多，亦懷疑做office boy呢類cheap工既男人，係咪真係註定孤獨終老。呢幾年，傳說中的乜野興趣班、網聚、黃金討論區交友group都試過，全部食白果；義工，搵唔到，報左名都冇下文；教會，過唔到自己o個關。最老土既筆友都試埋，試過不下十幾個，結果呢？有D就寫落至知係人妖黎，女既呢，個個細我十幾年，都係18 22，最大26，都算，仲要幾乎個個有仔(誰說香港女多男少？)；少數(應該係)冇仔既，就寫一兩封就唔知點解唔再寫，都唔知係咪畀第二個溝左。但點都好，冇一個見到面、甚至交換到facebook。戲肉到：係咪真係冇女埋過身呢？又唔係，2011-2012年，32-33歲時，叫做同兩個女仔有過火花，一個噯昧過，經歷過刻骨銘心既日子(對我黎講係，對佢唔知)。但始終冇拍過拖，亦冇可能拍拖，因為佢唔會要公屋仔；後來輾轉有人溝佢(佢從來好多人溝，但逢公屋仔必拒)，其中有條仔住居屋，雖然居屋，但屋苑名霸氣十足儼如豪宅，條女冇乜腦又唔上網，可能以為真係豪宅，畀條仔(老豆老母既物業)迷著，冇再搵我了，可能2014-2015年已嫁左。另一個，2012年時，令我以我33歲高齡突破A0，但同佢拍得完全唔開心，佢都係揀過曬其他仔，其他仔請曬佢食檸檬，揀到最後至揀我；又係佢要求拍拖既，開頭佢都知我環境，乜都話一齊承擔一齊面對，拍落就反曬口，係咁單打我(詳情恕隱)；雖然冇見過家長，但從某D蛛絲馬跡，睇得出佢父母唔鐘意我，結果三個月都冇就散，之後朋友都唔係(再之後佢同左個私樓仔拍拖，就完全唔同世界，再幾個月結埋婚，你話同公屋私樓冇關，就真係呃鬼食豆腐)。眼前已係一片絕望，仲有兩個大危機：一係2013年尾，35歲時，開始發現有地中海禿頭，上網搵到第一個結果係維SWC素，食左3年，冇大改善或轉差，唔知有冇用。2016年尾，開始轉食Finasteride同用minoxidil，唔知有冇用，冇用就真係死得。二係我媽已經61.5歲，雖然冇乜大病痛，但萬一佢走左，間公屋唔知有冇得轉我名，冇就聽訓街，仲有我個弱智自閉細佬細佬又唔知點算。唯一希望，係我知佢買左唔少保險，希望份保險金夠畀新界西北N手一人居屋首期。好多謝c hing睇完呢篇長文，有冇 c hing慘得過我。如果我係女的話，我唸我一早結左婚。