[玩命系列]港男單拖闖入大阪禁地　連日本人都唔敢去嘅景點 | 真心膠 | 膠Hub

大阪作為最愛香港人喜愛嘅日本城市之一，除咗「食、買、玩」，大家對佢嘅了解有幾多？ 跟著名景點通天塔嘅一街之隔，竟然有一個連日本人都唔敢入去嘅地方——愛鄰區，被喻為「日本最貧窮的地方」，究竟大阪嘅繁華背後點解會出現一個咁嘅禁地？連登巴打「evilalien666」就玩命式闖入，實地拍攝，真係令人大開眼界！

閱讀全文
呢位巴打唔係玩玩下，真係做足背景資料搜集㗎！話說喺日本經濟高速增長嘅年代，大阪有好多大型基建發展，需要大量基層勞工，佢哋大部分都聚居喺愛鄰區，呢班日薪制嘅勞工，生活並冇保障，直到後期日本經濟衰退，失業、年老、貧窮等問題浮現，加上黑幫嘅滲入，警察又貪污受賄，令到區內嘅人積埋好多怨氣，曾引發二十多次暴動！



1990年，第22次西成暴動，汽油彈都出埋！

日本政府視愛鄰區為老弱傷殘、貧窮、暴力、黃賭毒嘅集中地，當地人都唔願提起呢個咁「失禮」嘅地方，而喺地圖上，愛鄰區更加係「被失蹤」！


黑幫控制下，連當地攝製隊都好難入去拍攝，所以「evilalien666」巴打呢次單拖入去偷拍，絕對係玩命！

愛鄰區跟著名景點通天塔只有一街之隔，但係同大阪其他地區嘅繁華相比，就好似平行時空咁！

地踎店舖，賣嘅嘢價錢好平，不過真係唔多開胃，難怪巴打話唔多想幫襯！




街上只得老弱傷殘，冇乜後生仔。

耆英雲集棋藝館

舊式機鋪，以為去咗80年代嘅油麻地。

真香港人遇上偽「香港」！

地下「四仔」戲院，入面啲座位冇人敢坐，個個排排企欣賞「愛情動作片」！


巴打入咗戲院一分鐘就雞咁腳走，話頂唔順入面濃烈嘅「異味」喎！


睇到呢度，或者你會話，都唔係好恐怖啫！巴打話下集會深入極地，包括全日本防禦力最強嘅西城警局、露宿者集中地，拭目以待！
[玩命系列]港男單挑日本攝製隊　攻入全日本最強防禦力差館話說喺冇幾耐之前，有位連登巴打「evilalien666」勇闖大阪嘅「罪惡之城」愛鄰區…嘅外圍拍攝，俾網民柴台話佢冇料到！嗱！戲肉嚟喇！今集佢就帶大家深入被喻為「全日本最強防禦力」嘅差館、露宿者陣地拍攝，繼續窺探呢個「連日本人都唔敢去」嘅禁地！大家準備好個膽未？出發喇喂！
明明上次都係單拖roll機拍攝，突然有「筆直」請成隊crew？原來係巴打喺路上遇到嘅日本攝製隊嚟㗎！


本身巴打想跟住佢哋尾一齊去拍嘢，諗住安全啲，點知跟咗佢哋大半日，都剩係喺外圍拍攝，點都唔敢入去，唯有單拖行動！


愛鄰區附近嘅地標——飛田新地，係大阪著名嘅紅燈區……同埋……黑幫陣地，好多都市傳聞都講到呢度好恐怖，但係又好多遊客都去過參觀喎！不過跟足「唔好影相」呢個不成文規舉，應該都有命出返嚟嘅！所以巴打都只係影咗一張相咁多！


返返去愛鄰區，一入區就有個「八袋長老」守住門口，唔通頭先嘅日本攝製隊驚咗佢？

有間麻雀館喎！咁咪同旺角、油麻地差唔多？

被喻為「全日本最強防禦力」嘅差館，究竟有咩秘密武器？


FF咗咁耐，點知門口得一個警察…同一碌棍！好似流流地……

為咗呢次拍攝，巴打專登上深圳華強西搵「文西」買神奇偷拍器，為咗保命咁話喎！

唔識日文都知，呢度好多人隨地小便，隔住個mon聞到陣「壓」味！


露宿者的「豪宅」，令人不期然諗起深水埗通州街……


「樓底高，又開揚」，仲以為睇緊樓盤節目……




500 Yen一晚嘅旅館，環境陰森恐怖！你以為冇「人氣」？巴打話佢想住都冇房呀！





吓！咁就完㗎嗱？巴打話仲有第3集，係最後一集喎！快啲出片喇！等你呀！
睇片《第一集》
睇片《第二集》
膠通消息來源：「1個人製作」YouTube Channel、連登


[圖擷取自網路，如有疑問請私訊]