出Post插廣告惹女主角現身　網民：KOL拎紙袋後又一作品 | 真心膠 | 膠Hub

唔知大家依排有冇見過Dove嘅廣告呢？今次Dove嘅廣告就用咗「停批評、欣賞美」去做宣傳，仲搵咗兩位好有自信嘅女主角，話要欣賞最滿意嘅自己。閱讀全文

但KOL倫敦人妻先生好似唔認同，今次個廣告，就出咗篇長文批評！

內文如下：
在批評和欣賞之間，還有很多種反應，例如係：無反應；在醜和美之間，還有很多種感覺，例如係：無感覺。
圖中兩個女人，真心講句：唔靚。但也真心講句：唔醜。就是很典型的路人臉，是他也是你和我，你喺街上唔會見到佢想要多望一眼，但是，也不會覺得對方影響市容，想拖佢出去打，就是很普通很平凡的樣子。
這個廣告最大的問題是，明明唔「美」，點解要夾硬話「美」？
抱歉，可能呢句唔太岩聽：美和醜真係有一定標準。梵高的《向日葵》是美，我畫的火柴人是醜；張學友唱歌係令人耳朵懷孕、旺角大媽唱歌會讓人耳朵流產，這是美醜和高低之分。我唔可以話因為大媽好有自信，所以佢嘅歌聲係「美」，當然，也可能係我唔識欣賞大媽佢「老美」。但總的來說，靚就係靚，唔靚就係唔靚，有自信係會加分，但唔代表一定會絕地反彈。無得因爲大愛左膠而夾硬「流著汗紅著臉」俾兩分同情分— 明明唔靚都話對方靚。
當然，你可以話美同醜的標準係經常改變。唐代鍾意肥，pizza面才是美。喂，大佬呀，你望下個天，一天都係飛機呀！一街都係電腦呀！依家唔係唐代，就唔好拎唐代的標準出來審美吧？唔通又要拎女人紮腳才是美出黎講咩？咁拗無意思架啵。我只能夠同pizza面姐姐講句「生不逢時」，這不是她的錯，只是這個時代、此時此刻，她真的不靚，但也不醜，就是很平凡而已。
其實承認自己不足、承認自己唔靚，才是正確的方向。唔靚咪唔靚囉，唔駛死架喎，成個地球幾十億人，先得一個金城武，一個海港都只係得一個章魚誠（喂搞下gag姐）。大部份人都係咁平凡兼普通架啦，佢地會行出街俾人打咩？反而當你接受左自己唔靚，你先會開始找其方法令自己變得吸引。
一命二運三風水，四積陰德五做gym，你操靚個身型，衰極都可以做蝦（摵左個頭，個身就食得），再俾心機工作，來個鯉躍龍門，即刻變龍蝦（死心啦，唔會變龍，你條進化路線係咁架啦）；再唔係咪「人醜就該勤讀書」，腹有詩書氣自華，唔講外表都可以講氣質，落吧一樣溝死仔，反正落場大家都係普通人，沒有誰比誰美麗，癡癡呆呆，先有得坐埋一檯嘛。
我認同人要欣賞、也需要接受自己，但是，真的不需要非把自己冠以「美」不可。美也有美的煩惱，起碼沒有人會指著一個路人甲話「乜老左走晒樣、歲月不饒人」不信？看著一眾曾經年輕美麗的明星被人評頭品足，你估有幾多個可以好似羅蘭姐老得如此優雅？說是詩意重，說是畫意重，誰料難得百日紅？
此文一出，引起唔少粉絲嘅共鳴，好多人都話支持人人妻先生嘅觀點。

咁當然，實有啲插佢嘅留言。



之後，有個反倫敦人妻先生嘅Group「倫敦人西先生手記」就有網民出文反駁，話廣告中說的是「美」(Beauty)，但人妻先生重點放咗喺靚唔靚 (Pretty)。」

內文如下：
其實，人西整篇文章都攪錯了一件事：廣告中說的是「美」(Beauty)，而人西批評的，卻是對方靚唔靚 (Pretty)。
美，是一種哲學概念，一般指「某一事物引起人們愉悅情感的一種屬性」。而「美學」，主要是研究審美，是心理學的分支學科。而美的對象，即自然美、藝術美、社會美等，都是經過人的感性、理性作用之後的結果。
而人西，就膚淺的直接批評人哋唔靚，「美」在人西這種冇靈魂冇深度冇智慧的毒L眼中，就是靚唔靚的意思，仲話係有一定標準的。的確，一個女人靚唔靚，社會是有一套標準的；但當Dove廣告中說的是「自信美」，是一個哲學、心理學概念，又哪來什麼標準？一幅油畫可以令人感受到美，一彎新月可以令人感受到美，藏族老奶奶臉上像刀刻一樣的皺紋可以令人感受到美。而廣告中的两位模特兒，當然也有她們美的地方。
錢鍾書曾引伏爾泰一段話：「何謂美？詢之雄蛤蟆，必答曰『雌蛤蟆是也』。」。這已經說明，每人心中都有一把量度「美」的尺度，不受社會標準規範。如果一位老先生大讚自己白髪蒼蒼的年老太太是最美的，那麼人西是否又要出言反駁，對老先生說：「真心講句，我覺得你老婆唔靚囉。」咁？
Dove的廣告概念，可視作是美學的教育，提倡、教育大家如何去欣賞各種各樣的美。人西整天在專頁中賣弄自己的文化知識，什麼看博物館呀寫詩呀開咪講文化呀詩書氣自華呀，扮哂有深度；但一見人講「美」，就淺薄地大肆點評對方有幾唔靚，同MK仔點評路邊行過的女仔索唔索的本質，是一樣的。而有關「美」的哲學，港產毒L人西，真係識條鐵咩。

講到依度，廣告女主角「豆豉眼」就現身喺「倫敦人西先生手記」仲留言回應！
全文如下：
Hello我係『豆豉眼』。
我無好不滿人妻先生，一直都覺得每個人都可以有自己睇法，佢唔一定要覺得我靚嘅，我鍾意我自己咪得囉。但作為一個女仔，又唔係咩明星，直接第一下真係唔識take同面對啲咁嘅言論，所以唔會唔開心，但又唔會覺得正呀好開心呀咁囉，咁好自然寧願眼不見為乾淨，咁啫。
但瞓醒一覺，我覺得自己需要表達一下自己嘅睇法。
作為被評論嘅對象，我首先的反應係『下？我做嘢啫』同時都感受到作為公眾人物/模特兒嘅無奈。例如呢次campaign，Dove同廣告公司想點樣去表達呢個idea，我地從來都無得選擇。而我接呢個工作時所收到嘅information係呢個campaign嘅出發點同最基本嘅概念-『欣賞自己獨特嘅美麗』。
當整容成為大潮流，個個都追求同眼同鼻同咀形，我更覺佢呢個廣告別具意義。而且作為一個咁大嘅品牌，願意花咁多budget去宣傳呢個idea，搵兩個完全無人識嘅女仔幫佢地express呢個概念。喺香港，有邊間公司會冒呢個風險？
由於我好欣賞佢地嘅諗法，所以都好開心可以接到呢個工作。
但好坦白講，我個人認為個execution的確可以再好啲。仲記得當佢地貼啲標籤喺我身上嘅時候，我感覺係『但從來都無人話我豆豉眼架喎』『講女性美，有好多唔同嘅方法，點解要用咁直白嘅方法然後標籤咗我先呢？』
簡單嚟講，唔夠型囉。
但我唔係廣告界專業人仕，對於marketing嘅嘢我一知半解，我無意加把嘴去批評別人嘅創意。
不過當個print出咗街之後有諗，其實一般人喺地鐵站見到呢個廣告嘅時間唔多過三秒，而且一個地鐵站有幾十個廣告，要搵方法打入行人嘅眼簾唔容易，可能真係需要快同直接。而而家能夠引起討論，某程度上嚟講係成功嘅。
而講返自己，我真係好有性格㗎，我鍾意我自己而且我覺得自己很『美』。但如果你要用現今嘅審美標準我可能真係唔『靚』而且非常普通。不過，我有嘅係自信。我係一個追求緊自己理想嘅獨立女性，同擁有一雙欣賞自己身體嘅『豆豉眼』。我相信，咁樣就係『美』。
我三十有三，係一個舞台劇工作者，習慣咗接受掌聲之餘，亦懂得面對批評嘅聲音。但我替身邊被形容為『pizza面』嘅女孩子感到心酸，一個有番些少體型嘅女仔喺香港呢個社會上生存真係唔容易，而且工作時認識先知佢只係一個二十出頭嘅學生，真人非常可愛親切，但佢跟呢個娛樂圈子完全無任何關係，然後貿貿然行出嚟用自己嘅外形作為焦點拍一個咁樣嘅廣告要好大勇氣，到最後要佢面對咁樣嘅評論，我覺得對佢好唔公道。
我唔在乎人妻先生說話講得有無論據，我只在乎說話出發點係『善良』與否。
現今網絡發達人人都可以作家，但請大家多多反思自己所講嘅說話係咪貪口爽滿足一時之快。我自己都係創作人，我知道文字嘅威力，所以更要謹慎運用自己支筆。要寫一兩篇有娛樂性嘅文章有幾難？但厲害的往往具有洞察力而不失同理心。共勉。

唔少人都提返Cova單嘢，原來KOL倫敦人妻先生之前都因為鬧Cova餅店，紅過一次！
膠通消息來源：倫敦人妻先生、倫敦人西先生手記
KOL公審餅店被串爆　網民：返你英國啦，香港唔啱你！肥仔黎最鍾意睇花生，今日又見到有位KOL出咗個Post鬧爆餅店。本身仲諗住好多人會跟住鬧爆餅店，出現公關災難，點知，劇情出現咗神反轉！
事倩是咁的，有位住喺英國嘅KOL「倫敦人妻先生」就開Post大鬧Cova餅店，話個店員西面喎！原來，人妻先生去左海港城買鞋，佢就話「我就試圖消費一下，希望振興香港經濟啦。」買完行到一半放鞋個紙袋卡爛咗，就衝左去旁邊的Cova 餅店度問：「唔好意思，可以借我一個紙袋嗎？」

 

全文如下：
話說今日人妻先生去左海港城，正所謂「心情好買鞋、心情唔好買鞋」，我就試圖消費一下，希望振興香港經濟啦。 點知，買完野行行下街，大概因為人品唔太好，遭受天譴突然間個紙袋卡一聲爛左，我名副其實「一地都係」。我人急生智，就衝左去旁邊的Cova 餅店度問：「唔好意思，可以借我一個紙袋嗎？」
之後個店員斜眼+西面答「無喎！」
嘩，呢一刻，我終於相信自己返左香港，呢種「過主啦，乞兒！」的嘴臉，除了香港也再沒有第二個地方可以為我帶來這種侮辱。
唔俾袋無問題，大家各為其主打份工，我都唔會難為你。你可以答「公司policy要買野先俾袋」，咁我咪買囉，你幾錢一件蛋糕、又幾錢一杯咖啡姐？家陣香港地邊個俾唔起幾十蚊？你講左我都要死R你個袋就話我唔岩姐，你駛唔駛咁樣嘅態度講野呀？
你唔幫公司sell我都算啦，但你可唔可以作個好啲嘅大話？大佬，你啲客買完cake好似非洲人咁捧上頭頂行架？幾百蚊買個蛋糕點會紙袋都冇個呀？我兩年前你中環分店在我樓下，我邊次買cake冇袋架？我課足你班粉皮一年金呀！大佬，講大話都算，但可唔可以唔好侮辱大家智慧？講個好啲的大話，例如尋晚有怪盜偷走晒啲紙袋、外星人入侵地球要用cova特製矜貴紙袋整防護網嘛！你咁講，我咪信囉！
COVA Milano – Hong Kong 我講明呀，依家唔係屈你送乜送物，我唔係垃圾廢老Q，唔好諗住送個蛋糕過黎，我當你面扔去餵狗，費事人地以為我未食過垃圾。
唔講啦，食tea buffet… 啲紙袋留返俾你地煲醋啦！
#由今日起邊個敢送cova俾我 #佢死俾我睇

哇，真係好大怨氣！但本身仲以為好多人會支持佢，點知⋯⋯
  咁其實「倫敦人妻先生」係咩人？

肥仔黎上網查咗一吓，原來「倫敦人妻先生」Kevin自小得悉自己的性取向後，生活喺歧視、壓抑的環境之下，點知遇上咗一個改變自己一輩子嘅德國男子 Maik，結咗婚之後原本計劃喺香港居住，但因為香港政局、雨傘運動令他對香港前途失望，令他覺得離開是唯一的出路，目前與丈夫定居倫敦。雖然住好遠，但每個星期都會喺蘋果出文講熱話。
膠通消息來源：倫敦人妻先生手記


[圖擷取自網路，如有疑問請私訊]